جۆ بایدن لە نامەیەکدا پشتیوانی لە هەرێمی کوردستان دەکات
پەیامی کورد... جۆ بایدن لە نامەیەکدا پشتیوانی لە هەرێمی کوردستان دەکات
نێچیرڤان بارزانی سەرۆکی هەرێمی کوردستان پێشوازی لە ماتیو تولەر باڵیۆزی ئەمریکا لە عێراق کرد.
بەپێی ڕاگەیەنراوێکی سەرۆکایەتی هەرێمی کوردستان، لە کۆبوونەوەیەکدا باڵیۆزی ئەمریکا نامەیەکی جۆ بایدن سەرۆکی وڵاتە یەکگرتووەکانی ئەمریکای گەیاندە نێچیرڤان بارزانی کە تێیدا جەخت لە پشتگیری ئەمریکا بۆ عێراق و هەرێمی کوردستان کراوەتەوە.
ئاماژە بەوەشکراوە، هەر دوو لا دۆخی سیاسی عێراق هەنگاوەکانی پرۆسەی سیاسی و کۆبوونەوەکانی ئەنجوومەنی نوێنەرانی عێراق و دۆخی هەرێمی کوردستانیان تاوتوێکردوە، هەروەها هەر دوو لا هاوڕابوون لەسەر پێویستی هەبوونی سیستەمێکی حوکمڕانی تەندروست لە عێراق لەسەر بنەمای متمانە و هاوبەشی ڕاستەقینەو پابەندی بە دەستوور و بنەماکانییەوە کە تەنیا ڕێگەیە بۆ ئارامی و سەقامگیری، جەختیشیان لە گرنگی بنیاتنانی متمانە و لێکگەیشتنی هاوبەشی نێوان لایەنە عێراقییەکان بۆ تێپەڕاندنی دۆخەکە و چارەسەرکردنی کێشەکان کردووەتەوە.
هەر لە ڕاگەیەنراوەکەدا هاتووە کە گفتوگۆی لایەنەکان لەسەر یاسای هەڵبژاردن لە هەرێمی کوردستان و گرنگی یەکڕیزیی لایەنە کوردستانییەکان لە بەغدا و کاری پێکەوەیی لەگەڵ لایەنە عێراقییەکان و گرنگی بەردەوامی گفتوگۆی هەولێر- بەغدا بۆ چارەسەرکردنی کێشەکان کراوەتەوە.