هەرێمی کوردستان وەک مەترسیدارترین ناوچەی مین ڕاگەیەندرا
پەیامی کورد... هەرێمی کوردستان وەک مەترسیدارترین ناوچەی مین ڕاگەیەندرا
دەزگای گشتی کاروباری مینی حکومەتی هەرێمی کوردستان ڕایدەگەیەنێت: هەرێمی کوردستان یەکێکە لە ناوچە مەترسیدارەکان بەهۆی پیسبوونی بە مین و پاشماوە جەنگی کە بە ڕووبەری (٧٧٦) کم٢ ڕووبەری خاکەکەی پیسکراوە.
دەزگای گشتی کاروباری مینی حکومەتی هەرێمی کوردستان بڵاوی کردەوە: هەرێمی کوردستان یەکێکە لە ناوچە مەترسیدارەکان بەهۆی پیسبوونی بە مین و پاشماوە جەنگی کە بە ڕووبەری (٧٧٦) کم٢ ڕووبەری خاکەکەی پیسکراوە بە مین و تەقەمەنی و پاشماوەی جەنگەییە نەتەقیووەکان کە لەلایەن دەزگای گشتی کاروباری مینەوە بەسەر (٣٥٠٠) ناوچەی مەترسیدار دابەشکراوە، کە لەو ناوچانە زیاتر لە (١٣٥٢١) هاووڵاتی بوونەتە قوربانی و ڕۆژانەش بە بەردەوامی گوێ بیستی هەواڵی نەخوازراوی ڕووداوی مین دەبین لە هەرێمی کوردستان، کە کاریگەری لەسەر لایەنی کۆمەڵایەتی و ژێرخانی ئابووری و ئاوەدانکردنەوە هەبووە.
ئەوەشی خستەڕوو: بۆ ئەو مەبەستە حکومەتی هەرێمی کوردستان لە ساڵی ٢٠٠٧ دەزگای گشتی کاروباری مین بۆ ئەو مەبەستە دامەزراند، کە ڕۆژانە بەبەردەوامی تیمەکانی خەریکی پاککردنەوە و لە ناوبردن و پووچەڵکردنەوەی مین و تەقەمەنین، مانگانە بە هەزاران مین و تەقەمەنی لە ناوچە مەترسیدارەکان و کێڵگە مین ڕێژەکان هەڵدەگرنەوە و پووچەڵیان دەکەنەوە.
ئاماژەی بەوەشکرد: تەنیا لە ماوەی سێ مانگی ڕابردووی ئەم ساڵ (کانوونی دووەم/ شوبات/ئازار) چالاکییەکانی دەزگای گشتی کاروباری مین بەوشێوەیە بووە:.
1. ژمارەی ئەو مین و تەقەمەنیانەی لە ناوبراون بریتی بووە لە (٢٧٩٦) مین و تەقەمەنی و پارچە تەقەمەنی جەنگی کە هەر یەکێک لەو مین و تەقەمەنیانە مەترسی بوون لەسەر گیانی چەندین هاووڵاتییان
2. کۆی ڕووبەری پاککراو لەو سێ مانگەدا بریتی بووە لە (١٥٦,٦١٥) م٢ کە دوای پاککردنەوەی ڕادەستی خاوەنەکانیان کراوەتەوە بۆ نیشتەجێ بوون و کشتوکاڵکردن دەتواندرێت دووبارە وەبەرهێنانی تێدا بکرێتەوە.