هۆکاری سەردانی شاندێکی سەربازی هەرێمی کوردستان بۆ بەغدا ئاشکرا دەکرێت
پەیامی کورد ... هۆکاری سەردانی شاندێکی سەربازی هەرێمی کوردستان بۆ بەغدا ئاشکرا دەکرێت
ئەمڕۆ شاندێکی سەربازی ھەرێمی کوردستان گەیشتە شاری بەغدا و لەگەڵ بەرپرسانی سەربازی حکوومەتی فیدڕاڵ کۆ بوونەوە. بەرپرسێکی وەزارەتی پێشمەرگەش دەڵێت، وەزارەتی پێشمەرگە دەخوازێت ھەماھەنگی سەربازی ھەبێت لە نێوان ھەردوولا.
لیوا بابەکر فەقێ ئەحمەد، بەڕێوبەری گشتی ڕۆشنبیری وەزارەتی پێشمەرگە، ڕایگەیاند: "کۆبوونەوە و سەردانی ئەمڕۆی شاندی وەزارەتی پێشمەرگە بۆ بەغدا تەواوکەری کۆبوونەوەکانی ڕابردووە لە نێوان پێشمەرگە و بەرگری عێراق، چونکە وەزارەتی پێشمەرگە دەخوازێت ھەماھەنگی و ھاوکاری ھەبێت لە بابەتە سەربازییەکاندا."
بەرپرسەکەی وەزارەتی پێشمەرگە گوتی: "ھەندێک جار ھەماھەنگی نێوان پێشمەرگە و بەرگریی عێراق لە ئاستێکی بەرزدایە و ھەندێک جاریش بەھۆی ڕووداوە سیاسییەکانەوە ساردی تێ دەکەوێت."
لیوا بابەکر فەقێ ئەحمەد ئاماژەی بۆ ئەوە کرد: "پێشتر بڕیار بوو چەند ژوورێکی ئۆپراسیۆنی ھاوبەش لە ناوچە کوردستانییەکان دروست بکرێن و ئەمڕۆش جەخت لەسەر ھەماھەنگی کرایەوە بۆ درووستکردنی ئۆپراسیۆنی ھاوبەش و ھەبوونی پەیوەندی سەربازی بۆ کارکردن پێکەوە." ھاوکات لە دوای تەواوبوونی کۆبوونەکە راگەێندرا کە دوو سەنتەری ھەماھەنگی ئەمنی لە ھەولێر و بەغدا دەکرێنەوە.