مەسروور بارزانی سەردانی هەموو لایەنەکان دەکات و کەسانی نوێ لە حکوومەت دادەمەزرێنن
پەیامی کورد ... ڕاوێژكاری مەكتەبی سیاسی پارتی دیموكراتی كوردستان رایگەیاند، دوای دەرچوونی مەرسوومی سەرۆكایەتی ھەرێمی كوردستان، مەسروور بارزانی دەست بە سەردانكردنی لایەنەكان دەكات، بۆ ئەوەی ناوی كاندیدەکانیان لێ وەربگرێت و كابینەكە ئامادە بكات و رادەستی پەرلەمانی بكات تا دەنگی لەسەر بدرێت.
عارف ڕۆشدی ڕاوێژكاری مەكتەبی سیاسی پارتی دیموكراتی كوردستان راێگەیاند : "دوای دەرچوونی مەرسوومی سەرۆكایەتی ھەرێمی كوردستان، مەسروور بارزانی ڕاستەوخۆ دەست بە سەردانكردنی لایەنەكان دەكات، بۆ ئەوەی كاندیدی لایەنەكان وەربگرێت و كابینەی خۆی ئامادە بكات و پێشكەشی پەرلەمانی بكات، تا دەنگی لەسەر بدرێت، چوونكە رێككەوتن لەسەر پۆستەكان كراوە".
راوێژكاری مەكتەبی سیاسی پارتی گوتیشی، رەنگە ئەمڕۆ یان سبەی مەرسوومی سەرۆكایەتی ھەرێم دەربچێت و دەست بە سەردانەكانی بكات، هەروەها سەردانی ھەموو ئەو لایەنانەش دەكات كە بەشداری لە كابینەی نوێدا دەكەن.
ڕۆشدی باسی لەوەش كرد، پارتی دیموكراتی كوردستان كاندیدی بۆ وەزارەتەكانی پشكی خۆی ئامادە كردووە و ئەمجارە زۆرینەی وەزیرەكان كەسانی نوێن، كە بۆ وەزارەتەكان دیاری كراون.