ئەنجوومەنی وەزیران بۆ تاوتوێکردنی چەند پرسێک کۆ دەبێتەوە

پەیامی کورد... ئەنجوومەنی وەزیران بۆ تاوتوێکردنی چەند پرسێک کۆ دەبێتەوە

ئەنجوومەنی وەزیرانی هەرێمی کوردستان، کۆبوونەوەی هەفتانەی خۆی بە سەرۆکایەتیی سەرۆکی ئەنجوومەنی وەزیران، ساز دەکات و چەند پرسێک تێیدا تاوتوێ دەکرێن.

ئەمڕۆ چوارشەممە 13/4/2022، ئەنجوومەنی وەزیرانی هەرێمی کوردستان، بە سەرۆکایەتیی مەسروور بارزانی، سەرۆکی ئەنجوومەنی وەزیران و ئامادەبوونی قوباد تاڵەبانی، کۆبوونەوەی هەفتانەی خۆی ئەنجام دەدات، لە بڕگەی یەکەمی کۆبوونەوەکەدا پوختەی سەردانی شاندی حکومەتی هەرێمی کوردستان بۆ بەغدا و کۆبوونەوە لەگەڵ وەزیری نەوتی عێراقی فیدراڵ دەخرێتە ڕوو.

لە بڕگەی دووەمی کۆبوونەوەکەش، گفتوگۆ لەبارەی پێداچوونەوە بە میکانیزمی کارکردن لەناو حکومەتی هەرێمی کوردستان، بە ئاراستەی برەودان بە لە ئەستۆ گرتنی لێپرسراوێتی و باشتر ڕاییکردنی کارەکان و جێبەجێکردنی بڕیارەکانی ئەنجوومەنی وەزیران دەکرێت.

لە بڕگەی سێیەمی کۆبوونەوەکەش ڕەشنووسی (پەیڕەوی ناوخۆی بازرگانی و تۆمار نامەی بازرگانی لە هەرێمی کوردستان - عێراق) و ڕەشنووسی پرۆژە یاسای نوێی وەزارەتی شارەوانی و گەشتوگوزار لە هەرێمی کوردستان دەخرێنە ڕوو، بۆ دەنگدان لەسەریان.

بڕگەی کۆتاییش پێشنیازی وەزارەتی کشتوکاڵ و سەرچاوەکانی ئاو دەبێت تایبەت بە هەڵگرتنی ڕەسمی گومرگی لەسەر ئاژەڵی هاوردەکراو لە مانگی ڕەمەزانی پیرۆز، بەهۆی بەرزبوونەوەی نرخی گۆشتی سوور لە بازاڕەکانی هەرێم دەخرێتە ڕوو.