کۆنسێرتی ئاینوور دۆغان لە تورکیا هەڵوەشێنرایەوە
پەیامی کورد... کۆنسێرتی ئاینوور دۆغان لە تورکیا هەڵوەشێنرایەوە
سەرۆکی شارەوانیی دەرینجەی سەر بە شاری کۆجەیلە لە تورکیا، کۆنسێرتێکی گەورەی ئاینوور دۆغان، گۆرانیبێژی ناوداری باکووری کوردستان هەڵدەوەشێنێتەوە. ئۆپۆزیسیۆنی تورکیا هاتووەتە دەنگ و دژی ئەو بڕیارەیە.
شارەوانیی دەرینجە، سەر بە پارتی داد و گەشەپێدان (ئاکەپە) یە، بە فەرمی کۆنسێرتی ئاینوور دۆغانی هەڵوەشاندەوە. سەرۆکی ئۆپۆزیسیۆنی تورکیاش دژی ئەو بڕیارە وەستایەوە و دەڵێت:» بە ئازادی لە دایک بووین و بە ئازادییش دەمرین''.
کەمال کلیچدارئۆغلۆ، سەرۆکی پارتی گەلی کۆماری (جەهەپە) کە گەورەترین پارتی ئۆپۆزیسیۆنی تورکیایە، لە هەژماری تایبەتی خۆی لە تویتەر، پشتگیریی خۆی بۆ ئاینوور دووپات کردەوە.
کلیچدارئۆغڵو دەنووسێت:» میوزیکی شەوانە قەدەغەیە، شارەوانیی ئاکەپە میوزیکی کوردی قەدەغە دەکات، کەواتە با دەستوور بگۆڕن و هەموو بابەتێکی سەرگەرمی قەدەغە بکەن و ئەوەش لەوان دەوەشێتەوە. ئەی ئاکەپە ئەمە باش لە مێشکتدا بچەقێنە، کە بە ئازادی لە دایک بووین و بە ئازادییش دەمرین''.
دەبوایە ٢٠/٥/٢٠٢٢ ئاینوور دۆغان کۆنسێرتەکەی ئەنجام بدایە و پێشتر مۆڵەتی وەرگرتبوو، بەڵام شارەوانیی دەرینجە، بەهۆی ئەوەی گۆرانییەکانی ئاینوور بە کوردین، بۆیە بە فەرمی کۆنسێرتەکەی هەڵوەشاندەوە.
ئاینوور دۆغان، لە ١١/٣/١٩٧٥ لە باکووری کوردستان لە دایک و باوکێکی کورد لە دایک بووە. گۆرانییەکانی بە کوردین و ناوبانگێکی گەورەی لە تورکیا و دەرەوەی تورکیادا هەیە. ئاینوور خاوەنی چەندین ئەلبوومی گۆرانییە و لە ساڵی ٢٠٠٢، توانی بناسرێت و گۆرانییەکانی بچێتە ناو خەڵک لە تورکیا و دەرەوەی تورکیا.
پێشانگەی میوزیکی جیهانیی وۆمێکس 'WOMEX''' خەڵاتی هونەرمەندی ساڵی ٢٠٢١ی بە ئاینوور دۆغان بەخشی.