وەزارەتی بەرگریی بەریتانیا پرسەنامەیەك ئاراستەی وەزارەتی پێشمەرگە دەكات
پەیامی کورد … وەزارەتی بەرگریی بەریتانیا پرسەنامەیەك ئاراستەی وەزارەتی پێشمەرگە دەكات
ڕۆژی یەكشەممە وەزارەتی بەرگریی بەریتانیا لە رێگەی کۆنسوڵخانەی گشتیی بەریتانیا لە هەولێر، پرسە و سەرەخۆشی لە وەزارەتی پێشمەرگە و خانەوادە و کەسوکاری ئەو دوو شەهیدەی پێشمەرگه كرد، کە دوێنێ لە پەلامارێکی تیرۆریستانی داعش لە سنووری پردێ شەهید بوون.
لەو پرسەنامەیەدا، کە ئاراستەی شۆڕش ئیسماعیل وەزیری پێشمەرگە و سەربەست لەزگین بریکاری وەزارەت و خانەوادە و تەواوی هێزەکانی پێشمەرگە کراوە، تیایدا هاوخەمی قووڵی خۆیان بۆ ئەو پەلامارە تیرۆریستیە دەربڕیوە و پشتیوانی و پشتگیری بەریتانیایان بۆ هێزەکانی پێشمەرگە و وەزارەتی پێشمەرگە دووپات کردووتەوە.
ئەمەی خوارەوە دەقی پرسەنامەکەیە:ـ
لە کۆڵۆنێڵ سێر چارلس سایکس بی تی بۆ عەمید روکن محەمەد سەعید لە وەزارەتی پێشمەرگەی حکوومەتی هەرێمی کوردستان
بەناوی وەزارەتی بەرگریی شانشینی یەکگرتووی بەریتانیا و کونسوڵی گشتیی هەولێر، دەمەوێت سەرەخۆشی لە وەزیر و جێگرەکەی و هەموو پێشمەرگەکان بکەم، بەهۆی شەهیدبوونی خەمبارانەی دوو پێشمەرگەی قارەمان، کە شەوی ڕابردوو هەواڵەکەمان پێ گەیشتووە، تکایە سەرەخۆشیمان بۆ کەسوکاریان و هاوکاران و پێشمەرگە بریندارەکان لەم کاتە خەمبارەدا لێ قەبوڵ بکەن.
بەردەوامبوونی نائارامی و توندوتیژی لە ناوچە کێشە لەسەرەکان، راستەوخۆ کاریگەری لەسەر ئاشتی و گەشەسەندنی ئەم هەرێمە بێوێنەیە دەبێت. ئێمە پاڵپشتی ئێوە دەکەین لەشەڕی دژ بەداعش و دژی هەموو گروپە تیرۆریستییەکان، کە هەڕەشە دەکەن لە سەقامگیری و ئاسایشی ناوچەکە، ئێمە لەگەڵ هاوکارەکانمان لە هاوپەیمانی نێودەوڵەتی دژی داعش، بەردەوام دەبین لە پشتیوانی و پێشکەش کردنی هاوکاریەکانمان بۆ هێزەکانی پێشمەرگە، هەروەها پشتیوانی لەو هەوڵ و کۆششە خێرایانە دەکەین، کە بۆ نوێکردنەوە و یەکخستنی هێزەکانی پێشمەرگە دەیدەن. بۆ باشترکردنی ئاسایشی ناوچە کێشە لەسەرەکانیش بە هاوبەشی لەگەڵ هێزەکانی عێراقی فیدراڵ هاوکار و پاڵپشت دەبین.
بە دڵسۆزییەوە
چارلس سایکس
ڕاوێژکاری بەرگریی تایبەت لە کۆنسوڵخانەی گشتیی بەریتانیا لە هەولێر ـــ هەرێمی کوردستانی عێراق
31ی تشرینی یەکەمی 2021