وەزارەتی کارەبا : بە شێوەیەکی گشتی بەرهەمهێنانی کارەبا لە هەرێمی کوردستان لە زیادبوون دایە
پەیامی کورد ... وەزارەتی کارەبا : بە شێوەیەکی گشتی بەرهەمهێنانی کارەبا لە هەرێمی کوردستان لە زیادبوون دایە
وەزیری کارەبای حکوومەتی هەرێمی کوردستان دەڵێ، بە شێوەیەکی گشتی توانیویانە بەرهەمهێنانی کارەبا لە هەرێمی کوردستان زیاد بکەن و دانی کارەبا بە هاووڵاتییان لە زیادبووندایە.
ئەندازیار، کەمال محەمەد، لە کورتە چاوپێکەوتنێکدا ڕایگەیاند : "بۆ بەردانی ئاو پێویستیمان بە هەماهەنگی حکوومەتی عێراق و وەزارەتی کشتوکاڵ و سەرچاوەکانی ئاوە، بۆ بەردانی ئاویش پلانی خۆیان هەیە، بۆ مانگی ٧ ئێستا لە دووکان ٢٧٥ مەتری چوارچێوە لە چرکەیەکدا بەر دەدرێ، ئەمەش بووەتە هۆکاری زیادبوونی بەرهەمهێنانی کارەبا و گەیشتووەتە ٢٠٠ میگاوات کە پێشتر ١٢٠ بوو و لە دەربەندیخانیش ٧٠ میگاوات بوو بووەتە ٩٠ میگاوات، کەواتە بۆ مانگی ٧ تەنیا ١٠٠ میگاوات زیاد بووە."
- لە سەرەتای کابینەکەوە تا ئیستا توانیوتانە بەرهەمهێنانی کارەبا چەند زیاد بکەن؟
وەزیری کارەبا گوتی: "ئێمە ژمارەیەکی زۆر ڕێککەوتنمان کردووە بۆ زیادبوونی بەرهەمهێنانی کارەبا، تا ئێستا ١٥٠ میگاوات لە وێستگەی خەبات زیاد بووە و پێ دەچێ لە حەفتەی داهاتوودا ١٥٠ مێگاواتی تریش زیاد ببێت، ئەمەش دەچێتە نێو تۆڕی کارەبای گشتی، بەڵام ئێمە ڕێککەوتنی ١٠٠٠ میگاواتیمان کردووە و ماوەکەیشی ٣٠ مانگ بۆ تەواوکردنیەتی، ڕێککەوتنێکی ٣٠٠ میگاواتی کاروئاویمان کردووە بۆ سۆران و زاخۆ و ڕاپەڕین و گەرمیان، بەڵام بەهۆی کۆرۆناوە نەیانتوانیوە دەست بە کارەکانی بکەن. لە گەرمیانیش ڕێککەوتنێکی ١٦٥ میگاواتیمان هەیە لەو غازانەی دەسووتینرێن، هەروها پرۆژەیەکی ٧٥ میگاواتی لە وزەی خۆریشمان هەیە بۆ هەرسێ پارێزگای دهۆک و هەولێر و سلیمانی لە قۆناغی تەندەریدایە."
- پلان و ستراتیژییەتی داهاتووی وەزارەتتان چییە بۆ بەرهەمهێنانی کارەبا و دانی کارەبا بە کەمترین خەرجی؟
ئەو ووتی: "تا ئیستا ١٥٤٠ مێگاواتمان کردووە، هەموویشی بەبێ سووتەمەنی، ئەمەش هەنگاوێکی گرنگی ئەم کابینەیە.''
بۆ دانی کارەبا بە هاووڵاتییان لەم وەرزی گەرمایەدا، وەزیری کارەبا دەڵێت: "ئەگەر بەرواردێک بکەین لە نێوان مانگی ٦ی ساڵی ڕابردوو، مانگی ٦ی ئەمساڵ باشتر بووە، تێکڕای دانی کارەبا لە مانگی ٦ ـدا بۆ تەواوی کوردستان ١٦ کاتژمێر و ٢٨ خولەک بووە و ئێستاش ٤٠٠ هەتا ٥٠٠ مێگاواتی تر زیاد بووە لە مانگی ٦ و خواستی خەڵکیش زیاد بووە، بۆیەش پێ دەچێ دانی کارەبا بە هاوولاتییان لە ١٧ کاتژمیر کەمتر نەبێت."
دەستتان بە هەڵمەتی بڕینی کارەبای زیادەڕۆ و سەرپێچیکاران کردبوو، ئەوە گەیشتە کوێ؟
وەزیری کارەبا دەڵێت: "هەڵمەتەکە بەردەوامە، بەڵام شار لە شار جیاوازە، چوونکە هەندێک شار قەدەغەی هاتوچۆیان هەیە و لە هەندی فەرمانگە پشوویانە، ئەمەش بەپێی خوازیاریمان نییە."