سەرۆک بارزانی پێشوازی لە باڵوێزی فەڕەنسا لە عێراق دەکات
پەیامی کورد... سەرۆک بارزانی پێشوازی لە باڵوێزی فەڕەنسا لە عێراق دەکات
سەرۆك مەسعود بارزانی، پێشوازیی لە باڵوێزی فەڕەنسا لە عێراق كرد، باڵوێزی فەڕەنسا سوپاسی ڕۆڵ و پشتگیریی بەردەوامی سەرۆک بارزانیی کرد، لەو ماوەیەی کە وەک باڵوێزی فەڕەنسا لە عێراق کاری کردووە.
ئەمڕۆ دووشەممە 8/1/2024، سەرۆک بارزانی لە سەلاحەددین، پێشوازیی لە ئیریک شۆڤالیێ، باڵوێزی فەڕەنسا لە عێراق کرد، لە دیدارەکەدا باڵوێزی فەڕەنسا کە بە مەبەستی ماڵئاویی و بەبۆنەی کۆتاییهاتنی ئەرکەکەی سەردانی سەرۆک بارزانیی کردبوو، خۆشحاڵیی خۆی بە دیداری سەرۆک بارزانی نیشان دا و سوپاسی ڕۆڵ و پشتگیریی بەردەوامی سەرۆک بارزانیی کرد، لەو ماوەیەی کە وەک باڵوێزی فەڕەنسا لە عێراق کاری کردووە.
هەر لەو کۆبوونەوەیەدا، باس لە بارودۆخی سیاسی و ئاڵۆزییەکانی عێراق و ناوچەکە و ڕووداوەکەکانی ئەم دواییانە کران و بیروڕا لەبارەی دۆخەکە بە گشتیی ئاڵوگۆڕ کران.
هەر لەو دیدارەدا، سەرۆک بارزانی سوپاسی ڕۆڵی بەرچاوی باڵوێزی فەڕەنسای کرد، کە توانی پەیوەندییەکی باش و بەرچاو لەگەڵ هەموو لایەنە عێراقی و کوردستانییەکان دروست بکات و هیوای سەرکەوتنی بۆ خواست لە ئەرکە نوێیەکەیدا.
پەیوەست بە بارودۆخی عێراقیش، هەردوولا جەختیان لەوە کردەوە، کە پێویستە حکوومەتی فیدراڵیی عێراق پارێزگاری لە ئەمن و ئاسایشی عێراق بکات و یاسا سەروەر بێت، پەیوەندییەکانی نێوان حکوومەتی هەرێمی کوردستان و حکوومەتی عێراقی فیدراڵ و ڕێکارەکانی باشترکردنی ئەم پەیوەندییانە تەوەرێکی دیکەی دیدارەکە بوون.