سەرۆکی حکوومەتی هەرێمی کوردستان پێشوازیی لە کۆمسیاری باڵای نەتەوە یەکگرتووەکان بۆ مافەکانی مرۆڤ کرد
پەیامی کورد... سەرۆکی حکوومەتی هەرێمی کوردستان پێشوازیی لە کۆمسیاری باڵای نەتەوە یەکگرتووەکان بۆ مافەکانی مرۆڤ کرد
ئهمڕۆ دووشەممە 7/8/2023، مەسرور بارزانی، سهرۆكى حکوومەتی ههرێمى كوردستان، پێشوازیى له ڤۆلکەر تورک، کۆمسیاری باڵای نەتەوە یەکگرتووەکان بۆ مافەکانی مرۆڤ و شاندێکی یاوەری کرد.
لە دیدارەکەدا، سەرۆکی حکوومەت ئاماژەی بەوە دا کە گەلی کوردستان، لە درێژایی مێژوودا دووچاری چەندین کۆمەڵکوژی و جێنۆساید و پێشێلکردنی مافەکانی بووەتەوە و قوربانییەکی زۆری لەپێناو بەدەستهێنانی مافە ڕەواکانی داوە، بۆیە زۆر بە گرنگییەوە لە پرنسیپەکانی پاراستنی مافەکانی مرۆڤ و بەهاکانی ئازادی و دیموکراسی دەڕوانێت و داوا دەکەین کۆتایی بە پێشێلکردنی مافەکانی گەلەکەمان بێت و کۆمەڵگەی نێودەوڵەتی یارمەتیمان بدات بۆ دەستەبەرکردنی مافە ڕەواکانمان و پێویستە ڕێگە بگرن لە دووبارەبونەوەی کارەسات و جینۆسایدکردنی خەڵکی کوردستان.
مەسرور بارزانی کورتەیەکی دەربارەی چاکسازییە گشتگیرەکانی حکوومەتی هەرێمی کوردستان خستە ڕوو، بەتایبەتی پلانی پەسەندکراوی پێنج ساڵەی حکوومەتی هەرێم تایبەت بە پاراستنی مافەکانی مرۆڤ و ڕووبەڕووبوونەوەی توندوتیژی و توندڕۆیی و بەتایبەتی توندوتیژی دژی ئافرەتان. دووپاتیشی کردەوە کە پاراستنی مافەکانی مرۆڤ و پەرەپێدانی کولتووری بە یەکەوەژیانی ئاشتییانەی نێوان پێکهاتە جیاوازەکان، بەشێکی گرنگی کارنامەی کابینەی نۆیەمی حکوومەتی هەرێمی کوردستانە.
کۆمسیاری باڵای نەتەوە یەکگرتووەکان بۆ مافەکانی مرۆڤ، سوپاسی هاریکاری و هەماهەنگیی لایەنە پەیوەندیدارەکانی حکوومەتی هەرێمی کوردستانی کرد لەگەڵ نەتەوە یەکگرتووەکان بەتایبەتی لە بواری پاراستنی مافەکانی مرۆڤ .
بەرەنگاربوونەوەی لێکەوتە نەرێنییە هەمەلایەنەکانی گۆڕانی کەشوهەوا لەسەر ژیانی مرۆڤ و برەودان بە هۆشیاریی ژینگەپارێزی، تەوەرێکی دیکەی گفتوگۆکانی دیدارەکە بوو.