سەرۆك بارزانی پێشوازی لە جێگری وەزیری دەرەوی ئەمریكا کرد
پەیامی کورد ... سەرۆك بارزانی پێشوازی لە جێگری وەزیری دەرەوی ئەمریكا کرد
سەرۆك مەسعوود بارزانی لە سەلاحەددین پێشوازی لە خاتوو ڤیكتۆریا نولاند جێگری وەزیری دەرەوەی ئەمریكا بۆ كاروباری سیاسی و شاندێكی یاوەری كرد كە پێكهاتبوو لە خاتوو ئەلینا ڕۆمەنێسكی باڵیۆزی ئەمریكا لە عێراق و مارك سترۆ كونسووڵی گشتی ئەمریكا لە هەولێر و ژمارەیەك دیپلۆماتكاری ئەمریكی.
لە كۆبوونەوەكەدا بارودۆخی سیاسی عێراق و ناوچەكە و پەیوەندییەكانی نێوان حكوومەتی هەرێمی كوردستان و حكوومەتی فیدڕاڵی عێراق و پێویستی چارەسەركردنی كێشەكانی نێوانیان و بابەتی مافە دەستوورییەكان و شایستە داراییەكانی هەرێمی كوردستان تاوتوێ كرا.
هەر لەو كۆبوونەوەیەدا تیشک خرایە سەر هەڕەشە ئەمنییەكان و مەترسی سەرهەڵدانەوەی داعش لە عێراق و ناوچەكە و جەخت لە هەماهەنگی نێوان هەرێمی كوردستان و حكوومەتی عێراقی فیدڕاڵ و هاوپەیمانان كرا بۆ ڕووبەڕووبوونەوەی هەڕەشەی تیرۆر و ئاستەنگە ئەمنیەكان.
بارودۆخی سیاسی ناوخۆی هەرێمی كوردستان تەوەرێكی تری دیدارەكە بوو و شاندی میوان پێزانینی بۆ پێشەوەچوونی ژێرخانی هەرێم و ئارامی و سەقامگیری هەرێمی كوردستان هەبوو و، جەختیشی لە پێویستی هەماهەنگی و یەكڕیزی نێوان لایەنە سیاسییەكانی هەرێمی كوردستان كردەوە.
لە بەشێكی تری ئەو كۆبوونەوەیە سەرۆك بارزانی ئاماژەی بەوەدا كە هەرێمی كوردستان هەمیشە هەوڵی داوە لە عێراقدا فاكتەری سەقامگیری و چارەسەر بێت و خوازیاری ئەوەش بووە كە گرفتەكانی لەگەڵ حكوومەتی فیدڕاڵ بە گفتوگۆ چارەسەر بكات بەڵام كۆمەڵێك فاكتەر هەن كە بوونەتە ڕێگر لە چارەسەركردنی كێشەكانی نێوان حكوومەتی هەرێم و حكوومەتی فیدڕاڵ و گەڕانەوەی ئاوارەكان و ئاسایی بوونەوەی بارودۆخی دەڤەری شەنگال.