کۆسرەت ڕەسووڵ چەند ڕاسپاردەیەک ئاراستەی ئەنجوومەنی پارێزگای سلێمانی دەکات
پەیامی کورد ... کۆسرەت رەسوڵ عەلی، ئەندامانی فراکسیۆنی یەکێتی لە ئەنجوومەنی پارێزگای سلێمانی رایسپارد كە بەشێوەیەكی جیددی كار بكەن بۆخزمەتی پارێزگای سلێمانی و برەو بدەن بە خزمەتگوزارییەكانی شاری سلێمانی و خێراتر جێبەجێكردنی پڕۆژە خزمەتگوزارییەكانی شارەكە بەگشتی.
كۆسرەت ڕەسول عەلی، جێگری یەکەمی سکرتێری گشتی بە ئامادەبوونی حاكم قادر حەمەجان كارگێڕی مەكتەبی سیاسی لەگەڵ فراكسیۆنی سەوز لە ئەنجوومەنی پارێزگای سلێمانی كۆبووە و ڕەوتی دانووستانەكانی پێكهێنانی کابینەی نوێی حکومەت و چۆنیەتی بەشداری یەكێتی لە قۆناغی داهاتووی حوكمڕانی كوردستان بۆ فراکسیۆنەکەی خستەڕو.
کۆسرەت رەسوڵ ووتیشی، "كاری جیددی دەكەم، بۆئەوەی یەکێتی بەشدارییەكی كاراو ڕاستەقینەی هەبێ لە حۆكمڕانی كوردستان و ڕۆڵی یەكلاكەرەوەی هەبێ لە پرسە گرینگ و چارەنووسسازەكان".
جێگری سكرتێری گشتی، ئەندامانی فراكسیۆنی سەوزی ڕاسپارد كە بەشێوەیەكی جدی كار بكەن بۆ خزمەتی پارێزگای سلێمانی و دوپاتیكردەوە كە پێویستە چاودێرێكی وردی كارەكانی حكومەت بن و بەرنامەی وردیان هەبێ بۆ خزمەتی سلێمانی و برەودان بەخزمەتگوزارییەكانی شاری سلێمانی و خزمەتكردنی زیاتری هاووڵاتیان و خێراتر جێبەجێكردنی پڕۆژە خزمەتگوزارییەكانی شارەكە بەگشتی.
لە كۆبوونەوەكەدا حاكم قادر حەمەجان جەختیكردەوە، كە دەبێت ئەندامانی ئەنجومەنی پارێزگا ڕۆڵیان لە چاودێریكردنی فەرمانگەكان هەبێ و هەوڵبدەن بۆ پەكخستنی گەندەڵی و پاراستنی سەروەری یاسا و بایەخدان بە پاراستنی مافەكانی مرۆڤ،پشتیوانی لە داخوازییەكانی خەڵك بۆپڕۆژە خزمەتگوزارییەكان بكەن و كار بۆ سەقامگیری و ئارامی وئاسایشی خەڵك و ناوچەكە بكەن.