سەرۆکی هەرێم لە جەژنی ڕەمەزان : با لێبوردەیی و گەردن ئازادی بکەینە دەرفەتێک بۆ پتەوکردنی تەبایی

PeyamaKurd - سەرۆکی هەرێم لە جەژنی ڕەمەزان : با لێبوردەیی و گەردن ئازادی بکەینە دەرفەتێک بۆ پتەوکردنی تەبایی

سەرۆکی هەرێمی کوردستان، نێچیرڤان بارزانی، بە بۆنەی جەژنی پیرۆزی ڕەمەزانەوە پەیامێکی پیرۆزبایی ئاراستەی تەواوی موسڵمانانی کوردستان و جیهان دەکات، لە پەیامەکەیدا وێڕای جەختکردنەوە لە لێبوردەیی و گەردن ئازادی، داوا دەکات لەم دۆخە هەستیارەی ناوچەکەدا، تەبایی و یەک دەنگی بکرێتە بنەما بۆ ڕووبەڕووبوونەوەی ئاڵنگارییەکان و پاراستنی قەوارەی هەرێمی کوردستان.

دەقی پەیامەکەی سەرۆکی هەرێمی کوردستان:

بە بۆنەی هاتنەوەی جەژنی پیرۆزی ڕەمەزانەوە، گەرمترین پیرۆزبایی لە تەواوی موسڵمانان لە کوردستان، عێراق و جیهان دەکەم. بە تایبەتی پیرۆزبایی لە خانەوادە و کەسوكاری سەربەرزی شەهیدان دەکەم و هیوادارم ئەم جەژنە ببێتە مایەی ئارامی، ئاسوودەیی و کامەرانی بۆ هەمووان.

با مانا و پەیامە بەرزەکانی ئەم جەژنە لە لێبوردەیی، گەردن ئازادی و ئاشتەوایی، بکەینە دەرفەتێکی نوێ بۆ پتەوکردنی تەبایی و پێکەوەیی. لەم دۆخە هەستیارەدا کە ناوچەکەمان بە ئاڵۆزی و مەترسییەکانی شەڕدا تێدەپەڕێت، ئەرکی هەمووانە کە بە بەرپرسیارییه‌تی مێژوویی و نیشتمانییەوە کار بکەن بۆ پاراستنی قەوارەی هەرێمی کوردستان و ڕووبەڕووبوونەوەی ئاڵنگارییەکان.

ئێمە بە ئومێد و گەشبینییەوە لە داهاتوو دەڕوانین و دڵنیاین گەلی کوردستان بە خۆڕاگری و یەک دەنگی، ئەم قۆناغە سەختەش تێدەپەڕێنێت. هیوادارم جەژنی خێر و به‌خته‌وه‌ری بێت بۆ هەموو لایەک.

جەژنتان پیرۆز بێت، هەموو ساڵێک بە خۆشی.

نێچیرڤان بارزانی

سەرۆکی هەرێمی کوردستان

١٩/٣/٢٠٢٦