هیندستان/ کۆرۆنا لە دوو حەوتوودا گیانی ٥٠ هەزار کەسی ئەستاندووە

پەیامی کورد … هیندستان/ کۆرۆنا لە دوو حەوتوودا گیانی ٥٠ هەزار کەسی ئەستاندووە

بەرپرسانى هیندستان ڕایانگەیاند ، تا ئێستا زیاتر لە ٣٠٠ هەزار کەس بەهۆی کۆرۆناوە گیانیان لەدەستداوە و بەو ئامارەش ئەو وڵاتە دەبێتە سێیەم وڵات بۆ گیانلەدەستدانی زۆرترین کەس دوای ئەمریکا و بەڕازیل.

وەزارەتی تەندورستى هیندستان بڵاویکردووەتەوە،  ژمارەی گیانلەدەستدان لەسەرەتای هاتنى کۆرۆنا تا ئێستا گەیشتووەتە ٣٠٣ هەزار و ٧٢٠ کەس ، بەمەش دەردەکەوێت و تەنها لە ماوەی ئەم دوو هەفتەی دوایدا  ٥٠ هەزار کەس گیانیان لەدەستداوە.

ئەوەش خراوەتەڕوو، ژمارەى توشبووانیش تا ئێستا گەیشتووەتە زیاتر لە ٢٦ ملیۆن کەس و کە تەندروستى بەشێکیان خراپە.

ئەمەش لە کاتێکدایە جگە لە کۆرۆنا نەخۆشییەکی  ترسناکی دیکە لە هیندستان سەریهەڵداوە کە بە کەڕووی ڕەش ناسراوە و مەترسی لەسەر گیانی توشبوان  هەیە.