٢٧ هەزار سەربازی ڕووسیا لە شەڕی ئۆکراینادا کوژراون
پەیامی کورد... ٢٧ هەزار سەربازی ڕووسیا لە شەڕی ئۆکراینادا کوژراون
سەرۆکایەتی ئەرکانی سوپای ئۆکراینا ئاماری کوژراوانی سەربازانی ڕووسی لە دەستپێکی جەنگەوە تا ئەمڕۆ، ڕاگەیاند و دەڵێت، تا ئێستا زیاتر لە ٢٧ هەزار سەرباز کوژراون.
سەرۆکایەتی ئەرکانی سوپای ئۆکراینا ڕایگەیاند، لە ٢٤ کاتژمێری ڕابردوودا ٣٠٠ سەربازی دیکەی ڕووسیا کوژراون و لە سەرەتای جەنگەوە تا ئێستا ٢٧ هەزار و ٢٠٠ سەربازی ڕووسیا کوژراون.
بەگوێرەی زانیارییەکانی سەرۆکایەتی ئەرکانی سوپای ئۆکراینا، ٢٠٠ فڕۆکەی جەنگیی، ١٦٣ هەلیکۆپتەر، هەزار و ٢١٨ تانک، دوو هەزار و ٩٣٤ ئۆتۆمبێلی زرێپۆش، ٥٥١ تۆپهاوێژ، ١٩٥ مووشەک هاوێژ و ٨٨ سیستەمی بەرگریی ئاسمانیی ڕووسیا، تێک شکێنراون.
سەرۆکایەتی ئەرکانی سوپای ئۆکراینا ئاماژە بەوەش دەکات کە ڕووسیا دوو هەزار و ٥٩ ئۆتۆمبێلی سەربازیی، ٤١١ فڕۆکەی بێفڕۆکەوان و ١٣ کەشتی و یەختی خێرایی مامناوەندی لەدەستداوە، هەروەها توانراوە ٩٥ مووشەکی ئاراستەکراوی سوپای ڕووسیا لەلایەن یەکەکانی هێزی بەرگریی ئاسمانیی ئۆکرایناوە تێک بشکێنرێت.
ئەوە لە کاتێکدایە وەزارەتی بەرگری ڕووسیا پێشتر بڵاوی کردەوە هەزار و ٣٥١ سەربازییان لە ئۆکراینا کوژراون.