ڤلادێمیر پووتین گەیشتە هاربین
پەیامی کورد ... ڤلادێمیر پووتین گەیشتە هاربین
ڤلادێمیر پووتین، سەرۆککۆماری ڕووسیا گەیشتە شاری هاربین، کە دووەم شارییە کە لە چوارچێوەی سەردانەکەی دەوڵەتی بۆ کۆماری گەلی چین سەردانی دەکات.
بەگوێرەی زانیارییەکان ، ڤلادێمیر پووتین سەرۆککۆماری ڕووسیا لە پەکین ماوەتەوە پێش ئەوەی گەشت بکات بۆ شاری هاربین لە چین، لەوێ گفتوگۆکانی ڕووسیا و چین بەشێوەیەکی سنووردار و فراوان بەڕێوەچوو و دوای ئەوەش سەرکردەکانی ڕووسیا و چین بەشدارییان لە مەراسیمی واژووکردنی بەڵگەنامەکاندا کرد بەیاننامەیەک پێشکەش کرا.
دوای ئەوە ڕێوڕەسمێکی گەورە لەلایەن سەرۆکی کۆماری گەلی چینەوە بۆ ڕێزلێنان لە سەرۆککۆماری ڕووسیا بەڕێوەچوو. هەروەها پووتین و شی جین پینگ بەشدارییان لە کۆنسێرتێکی ئاهەنگگێڕان کرد کە بە بۆنەی ٧٥ ساڵەی دامەزراندنی پەیوەندییە دیپلۆماسییەکانی نێوان ڕووسیا و چین و کردنەوەی ساڵی ڕۆشنبیری ڕووسیا و چین. هەروەها ڤلادێمیر پووتین لە پەکین لەگەڵ لی کیانگ سەرۆک وەزیرانی ئەنجوومەنی دەوڵەتی کۆماری گەلی چین کۆبووەوە.
لە شاری هاربین، سەرۆک کۆماری ڕووسیا بڕیارە بەشداری لە مەراسیمی کردنەوەی هەشتەمین پێشانگای ڕووسیا و چین و چوارەمین کۆنفرانسی هاوکاری نێوان هەرێمەکانی ڕووسیا و چین بکات، هەروەها لەگەڵ خوێندکاران و مامۆستایانی زانکۆی پۆلیتەکنیکی هاربین کۆببێتەوە.