خەڵکی شارەکانی کوردستان لە ڕۆژی جەژندا سەردانی گڵکۆی شەهیدانی شۆڕشی ژینایان کرد

پەیامی کورد... خەڵکی شارەکانی کوردستان لە ڕۆژی جەژندا سەردانی گڵکۆی شەهیدانی شۆڕشی ژینایان کرد


خەڵکی ئازادیخوازی شارەکانی کوردستان لە ڕۆژی جەژندا، سەردانی گڵکۆی شەهیدانی شۆڕشی ژینایان کرد و پەیمانی وەفادارییان لەگەڵ شەهیدان نوێ کردەوە.

ڕۆژی هەینی ٢٠ی ئەپریلی ٢٠٢٣ کە هاوکات بوو لەگەڵ جەژنی ڕەمەزان، سەرەڕای میلیتاریزەکردنی گۆڕستانەکانی شارەکانی کوردستان لەلایەن هێزەکانی ڕێژیمەوە، خەڵکی بوێر و ئازادیخوازی شارەکانی سنە، بۆکان، مەهاباد، مەریوان، بانە و پیرانشار لەسەر گڵکۆی شەهیدانی شۆڕشی ژینا دروشمی مەرگ و نەمان بۆ دیکتاتۆریان وتەوە.

لە شارەکانی بۆکان، بانە، پیرانشار و مەریوان، بنەماڵەی شەهیدان و خەڵکی بوێر و چاونەترسی ئەو شارانە لەسەر گڵکۆی پیرۆزی شەهیدان کۆ بوونەوە و بە دروشمی ژن ژیان ئازادی، شەهید نامرێت و هەروەها بڵاوکردنەوەی سروودی شۆڕشگێڕانە لەسەر گڵکۆی شەهیدان، پەیمانی وەفادارییان لەگەڵ ڕێبازی شەهیدان نوێ کردەوە.

هەروەها خەڵکی شۆڕشگێڕ و ئازادیخوازی شاری سنە، بە دروستکردنی وێنەی شەهیدان و لێدانی وێنەکان لەسەر سینگیان، لەسەر گڵکۆی شەهیدانی شۆڕشی ژینا کۆ بوونەوە و لەگەڵ ڕێگا و ڕێبازی شەهیدانی کوردستان پەیمانیان نوێ کردەوە.

لەلایەکی ترەوە لە شاری مەهاباد، وێڕای ئەوەی کە خەڵک لەسەر گڵکۆی شەهیدان کۆ بوونەوە و دژی ڕێژیمی ئێران دروشمیان وتەوە، لاوانی نیشتمانپەروەر ئاڵای پیرۆزی کوردستانیان هەڵ کرد و لەسەر ڕێبازی کوردایەتی و ڕزگاریی کوردستان پێداگرییان کردەوە.