ڕێژەی قوربانییانی ڕووداوەکانی هاتووچۆ لە ئێران ساڵ بە ساڵ بەرزتر دەبێتەوە
پەیامی کورد... ڕێژەی قوربانییانی ڕووداوەکانی هاتووچۆ لە ئێران ساڵ بە ساڵ بەرزتر دەبێتەوە
بەپێی ئاماری هەواڵدەرییەکانی ڕژێمی ئێران، بەهۆی ڕووداوەکانی هاتووچۆوە لە ئێران لە هەر کاتژمێرێکدا ٢ کەس دەبنە قوربانی و ٢٩ی دیکەش بریندار دەبن.
"کەماڵ هادیانفەر" سەرۆکی پۆلیسی هێزی ئینتزامیی ڕژێم ڕایگەیاندووە کە بەهۆی ڕووداوی هاتووچۆوە لە هەر کاتژمێرێکدا لە ئێران ٢ کەس دەبنە قوربانی و ٢٩ کەسیش بریندار دەبن.
ناوبراو وتوویەتی، ٦٠ لەسەدی ڕووداوەکانی هاتووچۆ لە ٣٠ کیلۆمەتری شارەکان ڕوو دەدەن و لەو نەورۆزەدا ٤٣١ کەس بە ڕووداوەکانی هاتووچۆ بوونەتە قوربانی و زیاتر لە ٨ هەزار کەس بریندار بوونە.
ناوبراوهەروەها وتوویەتی، ٥٤ ملیۆن شۆفێر بە مۆڵەتنامەی شۆفێری و ٣٨ ملیۆن ماشین لە ئێراندا بوونیان هەیە کە ٣٨ لەسەدیان لە کار کەوتوون.
لە ئێراندا ١٢ ملیۆن ماتۆڕ سیکلێت بوونیان هەیە کە ١٠ ملیۆن و ٥٠٠ هەزار لەو ماتۆڕانە لە کار کەوتوون کە بەشی زۆری ئەو کێشەیە بۆ گەمارۆوە ئابوورییەکان و خراپیی چۆنیەتیی بەڕێوەبەری دەگەڕێتەوە.
دەگوترێت ٨ لەسەدی بەرهەمی ناوخۆی سەرفی تێچووی زیانەکانی ڕووداوەکانی هاتووچۆ لە ئێراندا دەکرێت.
ڕووداوەکانی هاتووچۆ ٥.٣ ملیار تمەن زیان لە ئابووری ئێران دەدات و ڕێژەی ٩ تا ١١ لەسەدی بودجەی حکومەت سەرفی ڕووداوەکانی هاتووچۆ دەکرێت.
لە ساڵی ڕابردوودا ١٧ هەزار کەس لە ئێراندا بە ڕووداوی هاتووچۆ گیانیان لەدەست داوە و ٣٦٠ هەزار کەسیش بریندار بوونە کە زۆرێک لەو بریندارانە کەمئەندام بوونە.
٢٣٦ هەزار کیلۆمەتر درێژیی ڕێگاکانی ئێرانە و ٥ هەزار و ٢٠٠ خاڵی کارەساتبار بوونیان هەیە کە نزیک بە ٣٨.٥ لەسەدی ئەو ڕووداوانە لەو خاڵانە ڕوو دەدەن و نەبوونی ڕووناکی لەو شوێنانە، بەرزی و نزمی و دۆخی خراپی ئاسفاڵتەکان لە هۆکارەکانی ڕووداوەکانی هاتووچۆن.