کۆریای باشوور قەدەغەی گەشتی هاووڵاتییانی بۆ عێراق درێژ کردەوە

پەیامی کورد... کۆریای باشوور قەدەغەی گەشتی هاووڵاتییانی بۆ عێراق درێژ کردەوە

ئاژانسی هەواڵی یۆنهاپی کۆریای باشوور ڕایگەیاند، حکومەتی کۆریای باشوور بڕیاریدا، ماوەی قەدەغەی گەشتکردن لە هاووڵاتییانی وڵاتەکەی بۆ ٧ وڵات درێژ بکاتەوە.

بەگوێرەی هەواڵەکەی ئاژانسی یۆنهاپ، هاووڵاتییانی کۆریای باشوور بۆ ماوەی ٦ مانگی دیکە، واتە تا کۆتایی کانوونی دووەمی ساڵی داهاتوو ناتوانن گەشت بۆ عێراق، یەمەن، سووریا، ئۆکرانیا، سۆماڵ و ئەفغانستان بکەن.

جگە لەو وڵاتانە، وەزارەتی دەرەوەی کۆریای باشوور، قەدەغەی گەشتکردنی بۆ چەند ناوچەیەکی سێ وڵات بۆ ماوەی ٦ مانگی دیکە درێژ کردەوە، ئەوانیش فلیپین، ڕووسیا و بێلارووس.

ئاژانسەکە ئاماژەی بەوەشدا، وەزارەتی دەرەوەی کۆریای باشوور پێیوایە، "ئاڵۆزی سیاسی و خراپی بارودۆخی ئەمنی و مەترسییەکانی تیرۆر بۆ ماوەیەکی زۆر لەو وڵاتانە بەردەوامییان دەبێت." هەر بۆیە بڕیاری قەدەغەی گەشتکردن درێژکراوەتەوە.

لە هەواڵی ئاژانسەکەدا هاتووە، بەپێی یاسای پاسپۆرت، وەزیری دەرەوە مافی خۆیەتی بەکارهێنانی پاسپۆرت سنووردار بکات و سەردان و مانەوە لە هەندێک وڵات و ناوچە قەدەغە بکات، لە پێناو پاراستنی گیان و ماڵی هاووڵاتییان.