ئۆکراینا هاوردەکردن لە ڕووسیاوە قەدەغە دەکات
پەیامی کورد... ئۆکراینا هاوردەکردن لە ڕووسیاوە قەدەغە دەکات
ئۆکراینا سەرجەم هاوردەکانی لە ڕووسیاوە قەدەغە کرد، کە پێش جەنگ ڕووسیا یەکێک بوو لە هاوبەشێکی سەرەکی بازرگانی ئۆکراینا کە ساڵانە بڕی نزیکەی ٦ ملیار دۆلار پێداویستی لە ڕووسیاوە هاوردە کردووە، هەروەها داواشی لە وڵاتانی دیکە کرد سزای توندتری ئابووری بسەپێنن بەسەر ڕووسیادا.
وەزیری ئابووری ئۆکراینا یولیا سڤیریدێنکۆ وتی " ئەمڕۆ بە فەرمی بازرگانییەکان لەگەڵ وڵاتە سەرکوت کارەکەدا هەڵدەوەشێنینەوە."
وتیشی " لە ئێستاوە هیچ بەرهەمێکی فیدراسیۆنی ڕووسیا هاوردەی وڵاتەکەمان ناکرێت."
لە سەرەتای دەستپێکردنی داگیرکەرییەکەی ڕووسیاوە لە ئۆکراینا هیچ بازرگانییەک و خزمەتگوزارییەک لەنێوان دوو وڵاتەکەدا نەبووە، بەڵام ئەم بڕیارە قەدەغەکردنی هاوردەکردن لە ڕووسیاوە دەکاتە یاسا.
وتی " ئەم جۆرە هەنگاوە دەبێت وەکو نموونەیەک بێت بۆ وڵاتانی ڕۆژئاوا و سزاکانی سەر ڕووسیا توندتر بکەنەوە، لەوانەش گەمارۆدانی وزەی ڕووسیا و گۆشەگیرکردنی سەرجەم بانکەکانی ڕووسیا."