سێ وڵاتی ئەورووپی لە بارەی ڕێککەوتنی ئەتۆمییەوە هۆشداری بە تاران دەدەن
پەیامی کورد... سێ وڵاتی ئەورووپی لە بارەی ڕێککەوتنی ئەتۆمییەوە هۆشداری بە تاران دەدەن
سێ وڵاتی ئەورووپا گومانیان لە نیازی ئێران بۆ گەڕانەوە بۆ ڕێککەوتننامەی ئەتۆمی هەیە و هۆشداری بە تاران دەدەن لە شکستی دانوستانەکان.
بەریتانیا و ئەڵمانیا و فەرەنسا، ڕاگەیاندراوێکی هاوبەشیان بڵاو کردەوە و ئاماژەیان بەوە کرد، پێشنیازی کۆتایی کە پێشکەشی تاران کراوە، زۆرترین نەرمی وڵاتانی ئەورووپا لەبارەی ڕێککەوتننامەی ئەتۆمی پیشان دەدات، بەڵام ئێران نایەوێت سوود لەو دەرفەتە دیپلۆماسییە چارەنووسسازە وەربگرێت و لەبری ئەوە بەبێ پاساو بەردەوامە لە بەرزکردنەوەی ئاستی بەرنامە ئەتۆمییەکەی.
ئاماژەیان بەوەشکرد، هەڵوێستی ئێران ئاسۆی گەڕانەوە بۆ کارکردن بە ڕێککەوتننامەکەی ساڵی 2015 تێک دەدات و گوومانیان لە نیازی ئەو وڵاتە بۆ گەڕاندنەوە بۆ ڕێککەوتننامەی ئەتۆمی هەیە.
ئەو سێ وڵاتە ڕاشیانگەیاندووە، لەگەڵ هاوبەشە نێودەوڵەتییەکانیان پرسی بە دەنگەوە نەهاتنی ئێران بۆ زیندووکردنەوەی ڕێککەوتنی ئەتۆمی و هەوڵەکانیان بۆ بەرەنگاربوونەوەی ئەو وڵاتە تاوتوێ دەکەن.