تەندروستی جیهانی: نەخۆشی تەراخومای چاو لەعێراق بنبڕ بووە
پەیامی کورد... تەندروستی جیهانی: نەخۆشی تەراخومای چاو لەعێراق بنبڕ بووە
رێكخراوی تەندروستی جیهانی پیرۆزبایی لەعێراق دەكات بۆئەوەی توانیویەتی نەخۆشیەكی مەترسیداری چاو بنبڕبكات كە بەتەراخوما ناسراوە و بەیەكێك لەكێشە تەندروستیە گشتیەكان دادەنرێت، بەوەش عێراق بووە پێنجەم وڵات لەرۆژهەڵاتی ناوەڕاست ئەو دەستكەوتە گرنگە بەدەست بهێنێت.
د.تیدروس ئەدهانۆم بەرێوبەری گشتی رێكخراوی تەندروستی جیهانی رایگەیاند: سەركەوتنی پرۆگرامی نیشتمانی تەراخوما لەعێراق ئەوەی دەرخست دەتوانرێت دەستكەوتی گرنگ بەدی بهێنرێت لەرێگەی سەركردایەتی و هاریكاری لەسەر ئاستی نیشتمانی.
وتیشی: ڕزگاربون لەتەراخوما پێدەچێت كاریگەری ئەرێنی لەسەر هاوڵاتیان هەبێت لەئێستا و ئایندەدا.
تەراخوما نەخۆشیەكی گواستراوەی مەترسیدارە كە لەكاتی چارەسەرنەكردنی دەبێتە هۆی كوێربوون، رێكخراوی تەندروستی جیهانی پلانی داناوە بۆئەوەی ئەونەخۆشیە لە100 وڵاتدا بنبڕ بكات تاوەكو ساڵی 2030.