کۆبوونەوەی مەکتەبی سیاسی لە هەولێر دەستی پێکرد
پەیامی کورد ... کۆبوونەوەی مەکتەبی سیاسی یەکیتی لە هەولێر دەستیپێکرد بە مەبەستی گفتوگۆكردن لەسەر هەوڵەكانی پێكهێنانی حكومەتی هەرێم و دانیشتنەكەی سبەی پەرلەمانی كوردستان
كۆبوونەوەی مەكتەبی سیاسی یەكێتی نیشتمانی كوردستان بەسەرپەرشتی كۆسرەت ڕەسول عەلی لەشاری هەولێر دەستیپێكرد بەمەبەستی گفتوگۆکردنی پشکی یەکێتی لە حکومەتی هەرێم و کۆبونەوەی سبەینێی پەرلەمانی کوردستان.
دوای ئەوەی كۆبونەوەی رۆژی 27 ی ئەم مانگەی نێوان هەردو وەفدی دانووستانكاری یەكێتی و پارتی و كۆتایی هات و ئامادەنەبوون هیچ لێدوان و زانیارییەك بۆ دەزگا راگەیاندنەكان ئاشكرا بكەن، هەوڵەكان لە ئاستی باڵای هەردو حزب لە رێگەی جموجوڵ و سەردان و گۆڕینەوەی پەیامەوە زیاتر چڕبونەوە بەمەبەستی گەیشتن بە رێككەوتن لەسەر پێكهێنانی كابینەی نۆیەمی حكومەتی هەرێمی كوردستان.
هەر بەپێی زانیارییەكان لە ماوەی دوو رۆژی رابردوودا یەكێتی و پارتی لە چەندین كەناڵی نافەرمییەوە پەیامی سەركردە باڵاو بڕیاربەدەستەكانی هەردوو حزبیان گەیاندووەتە یەك و هەردوولا نەرمیان لەئاست خواست و داواكارییەكانیان نواندوە لەپێناو گەیشتنە رێككەوتن..