حکوومەت پڕۆژەیاسای بوودجەی هەرێمی کوردستان ڕەوانەی  پەرلەمان دەکات

پەیامی کورد     ...   حکوومەت پڕۆژەیاسای بوودجەی هەرێمی کوردستان ڕەوانەی  پەرلەمان دەکات

ئەندامێکی لیژنەی دارایی پەرلەمانی کوردستان ووتی، دوای پەسەندکردنی یاسای بوودجەی گشتی عێراق و دیاریکردنی پشکی ھەرێم، حکوومەتی ھەرێمی کوردستان بەپێی ئەو یاسایە پڕۆژەیاسای بوودجەی ھەرێم ڕەوانەی پەرلەمان دەکات.

ئەرشەد حسێن ، ئەندامێکی لیژنەی دارایی پەرلەمانی کوردستان ڕایگەیاند : "ئەمڕۆ لیژنەی دارایی کۆ بووەوە و تێیدا نووسراوێکی فەرمیمان بۆ وەزارەتی داراییی حکومەتی ھەرێمی کوردستان ڕەوانە کرد بۆ ئەوەی بە زوویی پڕۆژەیاسای بوودجە ڕەوانەی پەرلەمانی کوردستان بکەن، چوونکە پەرلەمانی عێراق پڕۆژەیاسای بوودجەی گشتی خۆی پەسەند کردووە و پشکی ھەرێمی کوردستانیشی دیاری کردووە."

ئەرشەد حسێن ووتیشی: "حکوومەتی ھەرێمی کوردستان پڕۆژەیاسای بوودجەی خۆی ئامادە کردووە و چاوەڕێی میکانیزمی ناردنی بوودجە لە بەغداوە دەکەن، چوونکە حکوومەتی ھەرێم بەپێی ئەو پشکەی لە یاسای بوودجەی گشتی عێراقدا ھاتووە پڕۆژەیاسای بوودجەی خۆی بۆ پەرلەمانی ڕەوانە دەکات."

حسێن باسی لەوەش کرد: "حکومەتی ھەرێمی کوردستان چاوەڕێی پەسەندکردنی پڕۆژەیاسای بودجەی گشتی عێراقی دەکرد و ئێستاش ئەوە پەسەند کرا، بۆیە کاتی ئەوە ھاتووە پڕۆژەیاسای بودجەی خۆی بۆ پەرلەمان ڕەوانە بکات."

ئەمڕۆ بەپێی ڕاگەێندراوێکی وەزارەتی پلاندانانی حکوومەتی ھەرێمی کوردستان، وەزارەتی پلاندانانی حکوومەتی ھەرێمی کوردستان و وەزارەتی دارایی کۆ بوونەوە و تێیدا گفتوگۆ لەبارەی بوودجەی ھەرێمەوە کرا و باس لەوە کرا بڕیارە لە کۆبوونەوەی داھاتووی ئەنجوومەنی وەزیران گفتوگۆ لەبارەی بوودجەی ھەرێم بکرێت .

ھەر لە کۆبوونەوەکەدا گفتوگۆ لەبارەی دوایین ئامادەکارییەکانی پڕۆژەیاسای بوودجە کرا، بەتایبەت پەسەندکردنی پڕۆژەیاسای بوودجەی عێراق و ڕێککەوتنی نێوان ھەرێم و بەغدا .

ئەوەش خرایە ڕوو کە وەزیری پلاندانان باسی لەوە کرد، حکوومەت ھەموو ھەوڵێک دەدات بۆ دابینکردنی مووچە و باشکردنی بار و ژیانی ھاووڵاتیان و لەژێر ڕۆشناییی ئامادەکارییەکاندا بوودجەی ھەرێم کاری لەسەر کراوە و داوای خستنەڕووی پێشنیار و تێبینییەکانیشی کرد بۆ ئەوەی لە کۆبوونەوەی داھاتووی ئەنجوومەنی وەزیران گفتوگۆی لەسەر بکرێت.