هەر کارگەیەک مووڵەتی ناوخۆی هەرێــمی کوردستانی هەبێت دەتوانێ لە هەموو عێراق کار بکات
پەیامی کورد ... بەڕێوەبەری گشتی وەزارەتی بازرگانی حكوومەتی ھەرێمی كوردستان گوتی، كێشەی ئەو كارگانەی لە ھەرێمی كوردستان مۆڵەتیان ھەبوو و مۆڵەتی بەغدایان نەبوو، لەگەڵ بەغدا چارەسەر كراوە، بۆیە ھەر كارگەیەك مۆڵەتی ھەرێمی ھەبێت، دەتوانێ لە ھەموو عێراقدا كار بكات.
نەوزاد ئەدھەم، ڕاگەیاند: "پرسی كارگەكانی ھەرێمی كوردستان لەگەڵ بەغدا یەكلا كرایەوە و بەپێی ھەمان یاسای ساڵی ١٩٩٨ كاری پێ دەكرێت و ھەر كارگەیەك ھەر كەلوپەلێكی ھەیە، بۆ نموونە زەیت یاخود چیمەنتۆ یانیش شیشە و ھەر پێداویستییەكی دیكە، كە لێرە زیادە و سەرف نابێت، دەتوانێت رەوانەی پارێزگاكانی دیكەی عێراقی بكات و ئەوانیش رێگریی لێ ناكەن مادام مۆڵەتیان لە ھەرێمی كوردستان ھەیە".
ئەدھەم گوتیشی: "لە ھەرێمی كوردستان ٢١ھەزار كارگە تۆمار كراون و ئەوانەی بە كرداری كاریش دەكەن، ژمارەیان ٥ھەزار كارگەیە و ئەوانەی دیكەش لەبەر ئەوەی ئەو پێداویستییانەی بەرھەمی دەھێنن، لە دەرەوە دێت، خۆیان بەو كارەوە سەرقاڵ كردووە، بەڵام كێشەكەیان چارەسەر بووە و ئەگەر تەنھا مۆڵەتیان لە ھەرێم ھەبێت و لە بەغداش نەیانبێت، دەتوانن لە ھەموو عێراق كار بكەن".
ئەمەش لە كاتێكدایە، بەغدا پێشتر بڕیاری دابوو ئەو كارگانەی ھەرێمی كوردستان كە مۆڵەتی بەغدایان نییە، ناتوانن كەلوپەلەكانیان بۆ عێراق بگوازنەوە و پێویستە مۆڵەتی ئەوێیان ھەبێت، بەڵام لە رێگەی گفتوگۆی ھەردوو حكوومەتەوە، ئەو كێشەیە ئێستا چارەسەر كراوە.