حوکمی بەندکردن بە سەر هاووڵاتییەکی کوردی بۆکان دا دەسەپێندرێت

لقی ١٠١ی دادگای سزادانی شاری بۆکان بە سەرۆکایەتیی دادوەر "پەیمان ڕۆستەمی" هاووڵاتییەکی کوردی بەناوی "شێرکۆ تابناک" بە ٥ مانگ بەندکران و ٧ مانگ زیندانی هەڵپەسێردراو مەحکووم کردووە.

دادگا ئەو هاووڵاتییە کوردەی بە تاوانی "پڕوپاگەندە لە دژی نیزام بە قازانجی یەکێک لە حیزبە کوردییەکانی ئۆپۆزیسیۆنی دژبەری حکوومەتی ئێران" تاوانبار کردووە و ئەو حوکمە لەماوەی ڕۆژانی ڕابردوودا پێی ڕاگەێندراوە.

ئەو هاووڵاتییە ڕۆژی یەکشەممە ٢٧ی پووشپەڕ بە دانانی بارمتە بە شێوەی کاتی تا کۆتایی قۆناخەکانی دادگایی لە گرتنگەی دەزگای هەواڵگری " ئیدارەی ئیتلاعاتی " بۆکان ئازاد کراوە.

ئەمە لە حاڵێکدایە کە ڕۆژی چوارشەممە ٢٣ی پووشپەڕ بەرامبەر بە ٣١ی ئۆگۆستی ٢٠٢١، هێزە ئیتلاعاتییەکان بە بێ بەڵگەی یاسایی ئەو هاووڵاتییەیان دەستبەسەر کردبوو.