وەزارەتی کارەبا بەشداری لە پاراستنی ژینگە دەکات
پەیامی کورد ... وەزارەتی کارەبا بەشداری لە پاراستنی ژینگە دەکات
کەماڵ محەمەد ساڵح وەزیری کارەبا، بەمەبەستی بەشداریکردنی وەزارەتی کارەبا لە پاراستنی ژینگە، سەردانی عەبدولڕەحمان سدیق سەرۆکی دەستەی پاراستن و چاککردنی ژینگەی کرد و باسیان لە گرینگی پاراستنی ژینگە کرد کە بڕیارە گۆنگرەیەکی فراوان بۆ ئەم مەبەستە بەڕێوە بچێت.
لە کۆبوونەوەکەدا، باس لەم بابەتانەی خوارەوە کرد:
- پاراستنی ژینگە و گرینگیدان بە بەرهەمهێنانی کارەبا بە ووزەی نوێبووەکان، کە لە یاسا و رێنماییەکانی وەزارەتی کارەبا جێگر کراوە.
- وەزارەتی کارەبا گرینگی بە بەرهەمهێنانی کارەبا بە ووزەی خۆر دەدات و هەفتەی داهاتوو گرێبەستێکی بەرهەمهێنانی ٧٥ مێگاوات کارەبا بە ووزەی خۆر واژوو دەکات.
- بیرۆکەی بەرهەمهێنانی کارەبا بە گازی بەفیڕۆچۆی گازی سرووشتی لە کێڵگەی سەرسنگ چووە بواری جێبەجێکردنەوە.
- بەرهەمهێنانی ٣٠٠ مێگاوات کارەبا بە هایدرۆپاوەر گرێبەستی بۆ کراوە و لە مانگی داهاتوو دەستی پێ دەکرێت.
وەزیری کارەبا و سەرۆکی دەستەی پاراستن و چاککردنی ژینگە، پاش کۆبوونەوەکە، لە کۆنگرەیەکی هاوبەشی رۆژنامەوانیدا، ووڵامی پرسیاری ڕۆژنامەنووسانیان دایەوە.