وەزارەتی پێشمەرگە ھۆکارهكانی کەمبوونەوەی ھێرشهكانی داعش ئاشكرا دهكات
جێگری سوپاسالاری پێشمەرگە بۆ ئۆپراسیۆنەکان لە وەزارەتی پێشمەرگە رایدەگەینێت، ھۆکاری کەمبوونەوەی ھێرش و چالاکییەکانی داعش لە ناوچە کوردستانییەکان، بۆ ئەوە دەگەڕێتەوە کە ھەماھەنگی لە نێوان ھێزی پێشمەرگە و سوپای عێراقدا ھەیە و بەردەوامیش ئۆپراسیۆن دژی داعش ئەنجام دەدرێت.
لیوا قارەمان کەمال، ڕایگەیاند : داعش هێشتا لەناو نەچووە و دەیەوێت بوونی خۆی بسەلمێنێت، بۆ ئەوەی بڵێت ماوم، بەڵام چالاکی ئەوتۆی نەماوە دوای دروستبوونی ھەماھەنگی لە نێوان سوپای عێراق و پێشمەرگە لە ناوچە کوردستانییەکان، چوونکە ئۆپراسیۆنی بەردەوام ھەیە و هەرچەندە جاروبار ھێرش دەکات، بەڵام چالاکی کەم بووەتەوە بە ھۆی ھەماھەنگی نێوان وەزارەتی پێشمەرگە و وەزارەتی بەرگری عێراق.
کەمال ووتیشی، ھەماھەنگییەکە بەردەوام دەبێت و بڕیار دراوە بەردەوام کاری لەسەر بکرێت و زیاتریش بکرێت، بۆ ئەوەی داعش چیتر نەتوانێت زیان بە ناوچەکە بگەینێت، چوونکە تا ھەماھەنگی بەھێز بێت لە نێوان ھەردوو لادا، چالاکی و ھێرشەکانی داعش لاواز دەبن، بەڵام بتەوێت داعش تەواو بێت، ئەوە زەحمەتە، چوونکە ھەر کاتێک بۆیان بڕەخسێت، ھێرشی سەر ھێزی پێشمەرگە و ھێزە عێراقییەکان دەکەن.
جێگری سوپاسالار ڕوونیشی کردەوە، ھەماھەنگییەکان بە جۆرێک بەردەوام دەبن، کە رێگە نەدرێت چالاکییەکانی داعش کاریگەری ھەبێت و ئەگەر کۆبوونەوە لەسەر ئاستی باڵاش نەکرێت لە نێوان فەرماندەکانی ھێزی پێشمەرگە و سوپای عێراقدا، بەردەوامن لە هەماهەنگی، کە ئەمەش گرنگی و کاریگەری زۆری ھەیە.