سەرۆك بارزانی پێشوازی لە سەرۆكی هاوپەیمانی دەوڵەتی یاسا دەكات
پەیامی کورد ... سەرۆك بارزانی پێشوازی لە سەرۆكی هاوپەیمانی دەوڵەتی یاسا دەكات
ڕۆژی چوارشەممە ٢٥ـی ئابی ٢٠٢١ لە سەلاحەددین سەرۆك مەسعوود بارزانی پێشوازی لە نووری مالكی سەرۆكی هاوپەیمانی دەوڵەتی یاسا و شاندێكی یاوەری كرد.
لەو دیدارەدا بارودۆخی سیاسی لەسەر ئاستی عێراق و ناوچەكە و هەڕەشەكانی تیرۆر و تەحەددیاتی بەردەم پڕۆسەی سیاسی عێراق تاوتوێ كرا.
هەر لەو كۆبوونەوەیەدا تیشک خرایە سەر هەڵبژاردنەكانی داهاتووی عێراق و هەردوو لا جەختیان لەوە كردەوە كە بۆ ئەوەی هەڵبژاردن ببێتە هۆی سەقامگیری و ڕاستە ڕێبوونی پڕۆسەی سیاسی، پێویستە هەڵبژاردنەكان لە وادەی خۆی ئەنجام بدرێت و گەرەنتی ئەوەش هەبێت كە هەڵبژاردنێكی پاك و ئازاد و دادپەروەرانە لە ژینگەیەكی ئارام و دوور لە دەسكاری بەڕێوەبچێت و هەروەها هەموو لایەكیش ڕێز لە ئەنجامی هەڵبژاردنەكان و ئیرادەی گەل بگرن.