سكرتێری یەكەمی باڵیۆزخانەی كەنەدا پشتیوانی ووڵاتەکەی بۆ هێزەکانی پێشمەرگە ڕاگەیاند
پەیامی کورد ... تاریق گۆردن، سكرتێری یەكەمی باڵیۆزخانەی كەنەدا لە كوەیت، كە لەهەمان كاتدا بەرپرسی مەلەفی عێراقە، سەردانی مەكتەبی پەیوەندییەكانی دەرەوەی پارتی كرد و لەلایەن دارا باراوی و بەرپرسی دیسكی ئەمریكا و کەسانی دیكەی مەكتەبەوە پێشوازی كرا.
لەو دیدارەدا باس لە بارودۆخی ئێستای هەرێمی كوردستان و عێراق و ناوچەكە كرا و هاوكاری و ڕۆڵی كەنەدا بۆ هەرێمی كوردستان بەرز نرخێندرا. بەشێكی دیكەی گفتوگۆەكان پەیوەست بوون بە دواین پێشهاتەكانی ناوەڕاست و باشووری عێراق، باراوی ڕایگەیاند: "ئێمە وەكوو پارتی دیموكراتی كوردستان لەگەڵ داخوازییە ڕەواكانی خۆپیشاندەرانداین و پێویستە حكوومەتی عێراق ووڵامی درووستی هەبێت، كە جێگای ڕەزامەندییان بێت و ووڵامی داخوازەكانیان بداتەوە، ئێمە پشتیوانی تەواو لە حكوومەتی فێدراڵ و سەرۆكوەزیرانی ئێستای عێراق دەكەین. ئەوەی گرینگە و پێویستە ئەوەیە كە لایەنە بەشداربووەكانی حكوومەت پشتگیری لە سەرۆكوەزیران بكەن تاكو بتوانێت بەسەر ئەو كێشە كەڵەكەبووانەدا زاڵ بێت و نابێت هیچ لایەنێكی سیاسی داخوازیی خۆپیشاندەران بۆ مەرامی سیاسی بەكار بێنن لەبەرئەوەی ئەوە دەبێتە هۆكاری ئاڵۆزیی زیاتر".
تاریق گۆردن، سوپاسی ئەو پێشوازییەی كرد و جەختی كردەوە، كە هێزەكانی كەنەدا لە عێراق و هەرێمی كوردستان دەمێننەوە و پشتیوانی لە هێزی پێشمەرگە دەكەن بۆ شەڕی تیرۆر و مەشقی سەربازی بە هێزەكانی پێشمەرگە.
لە بەشێكی دیكەی ئەو دیدارەدا ڕەوشی ڕۆژئاوای كوردستان گەنگەشە كرا و بە مەترسی ناو برا و هەردوولا پێیان وابوو كە پێویستە كۆتایی بە هێرشی سەربازی توركیا بێت و ڕێگای ئاشتی بگیرێتە بەر بۆ چارەسەری سیاسی بۆ پرسی كورد لە ناوچەكەدا.