کاتی گەیشتنی بوودجەی هەرێمی کوردستان بۆ پەرلەمان دیاری کرا
پەیامی کورد ... کاتی گەیشتنی بوودجەی هەرێمی کوردستان بۆ پەرلەمان دیاری کرا
ئەندامێكی لیژنەی دارایی لە پەرلەمانی كوردستان ووتی، پڕۆژەیاسای بوودجە رەوانەی ئەنجوومەنی وەزیران كراوە و چاوەڕێ دەكرێت پەسەند بكرێت و لە سەرەتای مانگی داھاتوودا بگاتە پەرلەمانی كوردستان.
ئەرشەد حسێن یەکێک لە ئەندامانی لیژنەی دارایی لە پەرلەمانی كوردستان رایگەیاند: "وەزارەتی دارایی حكوومەتی ھەرێمی كوردستان پڕۆژەیاسای بوودجەی گشتی هەرێمی كوردستانی بۆ ئەنجوومەنی وەزیران رەوانە كردووە و چاوەڕێ دەكەین ئەنجوومەنی وەزیران دەنگی لەسەر بدات و پەسەند بكرێت و دواتر رەوانەی پەرلەمانی بكەن".
حسێن ووتیشی: "چاوەڕێ دەكرێت لە سەرەتای مانگی داھاتوودا پڕۆژەیاسای بوودجە لەلایەن ئەنجوومەنی وەزیرانەوە رەوانەی پەرلەمان بكرێت، بۆ ئەوەی ئێمەش كاری لەسەر بكەین و پەسەند بكرێت".
دەشڵێ: "ئێمە وەكوو لیژنەی دارایی خۆمان ئامادە كردووە، بۆ ئەوەی ھەر كاتێك گەیشتە پەرلەمان، دەست بە ئامادەكردنی راپۆرت لەبارەی پڕۆژەیاسای بوودجەوە بكەین".