زارا محەممەدی مامۆستای زمانی کوردی ئازاد کرا
پەیامی کورد... زارا محەممەدی مامۆستای زمانی کوردی ئازاد کرا
زارا محەممەد مامۆستای زمانی کوردی، دوای زیاتر لە ساڵێک لە زیندان ئازادکرا.
زارا محەممەدی لە گرتووخانەی چاکسازی و پەروەردەی سنە زیندانی کرابوو، بەوتەی خۆی ئێوارەی دوێنێ بەبێ ئاگاداربوونی خۆی و پارێزەرەکەی ئازادکراوە، ئەمە لەکاتێکدایە سزای پێنج ساڵ بەندکردنی بەسەردا سەپێندرابوو.
زارا محەممەدی دوای ئازادکردنی لە پەیامێکی ڤیدیۆییدا دەڵێت: “منیان بە شێوازێکی بەپەلە و بێ ئاگاداری پارێزەرەکەم لە بەندیخانە دەرکردووە”.
ئاماژەی بەوەشكردووە: “من پێشتر هەم خۆم بە بەندیخانەم راگەیاندبوو هەم لە رێگەی پارێزەکەمەوە بە دەستگای دادوەری رامگەیاندبوو کە بەهیچ شێوازێک داخوازی لێبوردن پێشکەش ناکەم و ئەم داخوازییەم قەبووڵ نییە، چونکە باوەڕم بە راستی رێگاکەم هەیە”.
وتویەتیشی: “من باوەڕم بە رێگە و بیرەکانم هەیە و تا کۆتایی ژیانم درێژەدەری بیر و رێگە و ئامانجەکەمم”.