پەکەکە ... زیاتر لە ٢٠ سەربازی تورک کوژراو و بریندار هەیە
بەرپرسێكی پەكەكە ڕایدەگەیەنێت، لە ئێوارەی دوێنێوە لە سنوری برادۆست سووپای توركیا لە هەوڵی پێشڕەویدایە بۆ ناو خاكی هەرێم، بەهۆیەوە شەڕ لە نێوان سوپای توركیا و گەریلاكانی پەكەكە روویداوەو تا ئێستاش بەردەوامە.
سەیدا رەزا گارسیا بەرپرسی ئاڵانا بردۆست -ی پەكەكە رایگەیاند، “كاتژمێر 7:00ی ئێوارەی دوێنێ لە ناوچەی خواكورك و گەلی ڕەش و چیابەن لە سنوری برادۆست شەڕ لە نێوان سوپای توركیا و گەریلاكانی پەكەكە روویداوە تا ئێستاش بەردەوامی هەیە”.
ئاماژەی بەوەشكرد، “لەشەڕو پێكدادانەكاندا نزیكەی 20 سەربازی سوپای توركیا كوژراون و ژمارەیەكی دیكەش برینداربوون”.
بەرپرسی ئاڵانا برادۆست -ی پەكەكە ئەوەشی خستەڕوو، “سوپای توركیا لە هەوڵی بەردەوامدایە بۆ بردنەوەی تەرمەنەكانیان، بەڵام بەهۆی نالەباری كەش و هەوا ناتوانن پێشڕەوی زیاتر بكەن”.
هەروەها سەیدا ڕەزا گارسیا وتیشی، فڕۆكەكانی سوپای توركیا بە بەردەوامی لە ئاسمانەوە چاودێری ناوچەكە دەكەن.