Rêber Ehmed: Çaksaziya di hêzên polîs de gihîşt qonaxa dawî

PeyamaKurd - Wezîrê Navxwe yê Hikûmeta Herêma Kurdistanê Rêber Ehmed ragihand ku proseya çaksaziyê di nava hêzên polîsê Kurdistanê de derbasî qonaxeke nû bûye û ji stratejiyeke nivîskî ber bi projeyên bicîkirina pratîkî ve tê veguhastin.

Ev pêngav ku di çarçoveya bernameya çaksaziyê ya Kabîneya Nehemîn de bi hevkariya Bernameya Neteweyên Yekgirtî ya Geşepêdanê (UNDP) û Şandeya Şêwirmendiyê ya Yekîtiya Ewropayê tê birêvebirin, armanc dike ku saziyeke pîşeyî, serdemiyane û cihê baweriya welatiyan ava bike.

Rêber Ehmed diyar kir ku di qonaxa yekem de dê kar li ser du projeyên sereke bê kirin: avakirina "Bingehên Polîs ên Nimûneyî" ji bo pêşkêşkirina xizmetguzariyên bilez, û veguherandina kolejên polîs bo "Akademiya Polîs" li ser bingeha zanyariyê.

Wezîrê Navxwe destnîşan kir ku bihêzkirina rol û serkêşiya jinan di nava refên polîs de yek ji pêşengiyên wan ên bingehîn e û divê bawerî û ezmûna welatiyan bibe pîvana serkeftina van reforman.