Trump: NATOyê alîkariya me nekir
PeyamaKurd - Serokê Amerîkayê Donald Trump got ku ew bawer dike ku Çîn alîkariya Îranê dike, lê ew dikarin "gelekî bêtir" bikin. Trump, mînaka alîkariya Amerîkayê ji bo welatên din ên mîna Ukraynayê anî ziman û got ku ew ji kiryarên Çînê pir bêhêvî nebûye.
Serok Trump doh di daxuyaniyên xwe yên ji bo Fox News de got ku wan di hilweşandina eniya tundrew a di nav hikûmeta Îranê de bi piranî serketî bûne û ger hewce bike wê hêmanên mayî zû ji holê rakin. Trump, serokatiya Îranê wekî "pir ecêb" bi nav kir û got ku di navbera wan de "tu hevrêzî" tune.
Rexneyên tund ên li ser NATOyê
Trump di daxuyaniyên xwe de bi tundî rexne li hevpeymaniya NATOyê jî kir û got, "Em ji NATOyê ne razî ne, NATO bi me re nebû. Me bi salan xizmeta wan kir, trîlyon dolar xerc kirin; lê dema ku me piçek alîkarî xwest, ew li tu derê nehatin dîtin."
"Binesaziya petrolê ya Îranê li ber hilweşînê ye"
Serokê Amerîkayê hişyarî da ku sektora petrolê ya Îranê bi tehdîda hilweşînê re rû bi rû ye û diyar kir ku ji ber cezayan, Tehran nikare petrola xwe di embaran an jî li ser keştiyan de hilîne, ev yek dibe sedema "teqîna" boriyên petrolê yên navxweyî û yên bin erdê.
Trump got ku Îraniyan jê re gotine ku wan tenê sê roj mane berî ku binesaziya wan a petrolê biteqe, û got, "Ev binesaziya wan qet nikare vegere rewşa xwe ya berê. Tewra ku were tamîrkirin jî, ew tenê dikare bigihîje ji sedî 50 kapasîteya xwe ya berê."
Hewldanên kuştinê û hişyariya çekên nukleerî
Trump di derbarê hewldanên kuştinê yên li dijî wî de got ku ew ji xetereyên karê xwe haydar e lê ji tiştê ku kiriye kêfxweş e. Trump diyar kir, "Heke hûn serokekî bi bandor bin, hûn di xetereyek mezintir de ne ji yên ku bêbandor in. Piraniya serokan bêbandor in û tiştê ku divê bikin nakin."
Serokê Amerîkayê, xeta sor a welatê xwe tekez kir û hişyarî da û got, "Divê em rê li ber Îranê bigirin ku çekên nukleerî bi dest bixe. Wekî din, tevahiya cîhanê û em bi xwe jî wê di xetereyê de bin. Ger çekên nukleerî yên wan hebin, Îsraîl wê di nav çend deqeyan de were tunekirin."