Mesrûr Barzanî fermana yekkirina hêzên Pêşmerge îmze kir

PeyamaKurd - Di çarçoveya hewldanên berdewam ên kabîneya nehemîn a hikûmetê de ji bo yekkirina hêzan, Serokwezîr Mesrûr Barzani fermana damezrandina desthilatên îdarî, darayî, yasayî û ragihandinê yên fermandariya herêmên di bin Wezareta Pêşmerge de îmze kir.

Berdevkê Hikûmeta Herêma Kurdistanê, Pêşawa Hewramanî, di daxuyaniyekê de roja Pêncşemê, 26ê Sibata 2026an de hûrguliyên fermana ku ji hêla Serokwezîr Barzanî ve hatiye îmzekirin parve kir.

Daxuyanî wiha ye: "Di çarçoveya hewldanên kabîneya nehemîn de ji bo ji nû ve avakirina rêzên hêzên Pêşmerge, Serokwezîr Barzanî fermana damezrandina desthilatên îdarî, darayî, yasayî û ragihandinê yên fermandariya herêmên di bin Wezareta Pêşmerge de îmze kir."

Berdevkê Hikûmeta Herêma Kurdistanê biryar wekî gaveke pratîkî di pêvajoya avakirin û yekkirina hêzên Pêşmerge de bi nav kir û got, "Îmzekirina van belgeyên destûrnameyê li gorî daxwazên hêzên hevpeymaniyê ye û beşek ji peymana stratejîk a yekkirina hêzan e."

Pêşewa Hewramanî di daxuyaniya xwe de herwiha tekez kir ku ev biryar vîzyona Mesrûr Barzanî ya ji bo avakirina hêzek neteweyî nîşan dide û got, "Serokwezîr Mesrûr Barzanî her tim bi tevahî piştgirî da hewlên Herêma Kurdistanê ji bo hebûna hêzek Pêşmerge ya yekgirtî û neteweyî û biryara îro temamkerê van hewldanan e."