Arteşa Tirkiye û Sûriyeyê pirekê 300 metreyî ava kirin

PeyamaKurd - Balyozê Tirkiyeyê yê Şamê Nuh Yilmaz ragihand ku Hêzên Çekdar ên Tirkiyeyê û artêşa Sûriyeyê li parêzgeha Dêrezorê bi hevkariyeke hevbeş pireke serbazî ya bi dirêjahiya 300 metreyî ava kirine.

Yilmaz li ser hesabê xwe yê fermî yê tora civakî peyamek parve kir û tê de diyar kir ku artêşa wan her du aliyên Çemê Firatê gihandiye hev û ev projeya endezyariyê ya serbazî şiyana xebata hevbeş û çandeke nû ya hevkariyê di navbera her du welatan de pir xurt dike.

Balyozê Şamê spasiya teva karmendên Wezareta Parastinê ya Neteweyî kir ku di vê xebatê de cih girtine û bi peyama "Tirkiye û Sûriye dest bide destê hev ber bi rojên geş ve" girîngiya vê pêngavê raste rast tomarkir.

Li aliyê din, Wezareta Parastina Sûriyeyê jî derbarê vê projeya endezyariyê daxuyaniyeke nivîskî ya fermî weşand daku hûrgiliyên operasyonê eşkere bike.

Di daxuyaniyê de hat destnîşankirin ku bi armanca hêsankirina hatûçûnê û kêmkirina barê giran ê li ser milê şêniyên herêmê, Yekemîn Endezyariya Serbazî ya Artêşa Sûriyeyê bi hevkariya ligel artêşa Tirkiyeyê li Dêrezorê dest bi avakirina pireke serbazî ya gerok kiriye.

Wezaretê ragihand ku ev kar di bin koordînasyona ligel Parêzgariya Dêrezorê de bi rê ve diçe daku her du aliyên çem bên girêdan û ev gav bibe sedema xurtkirina asayîş, ewlehî û geşepêdana aborî ya li navçeyê daku rê li ber her cûre aloziyên binesaziyê bê girtin.