Beqayî: Danûstandinên ligel Omanê avaker bûn lê Tengava Hurmizê girtî dimîne

PeyamaKurd - Berdevkê Wezareta Derve ya Îranê Îsmaîl Beqayî ragihand ku di rojên Înê û Şemiyê de, di navbera cîgirên wezîrên derve yên Îran û Omanê de li Tehranê çend gerên danûstandinan hatine encamdan. Beqayî diyar kir ku ev hevdîtin sûdewar û avaker bûn.

Di van civînan de her du aliyan li ser çêkirina mekanîzmeke hevpar ji bo birêvebirina tevgera keştiyan û berçavgirtina mafên xwedîtiyê yên welatên peravê yên Tengava Hurmizê axivîn û ramanên xwe li hev guhertin. Hate ragihandin ku şanda Omanê ji Tehranê vegeriyaye Mesqetê, lê danûstandinên teknîkî û siyasî dê berdewam bikin.

Rewşa ewlehî ya Tengava Hurmizê

Tevî van hewldan û civînên dîplomatîk, Beqayî tekez kir ku di rewşa ewlehî û serbazî ya Tengava Hurmizê de ti guhertineke nû çênebûye û tengav mîna xwe girtî dimîne.