Hindistanê notaya protestoyê da balyozê Îranê

Hikûmeta Hindistanê, piştî êrişa moşekî ya li ser keştiyên bazirganiyê ku tê de welatiyekî wan jiyana xwe ji dest da, Alîkarê Balyozê Îranê Mihemed Cewad Huseynî bangî avahiya Wezareta Karên Derve kir.

Rayedarên Hindistanê ji ber kuştina karmendê xwe yê deryayî û birîndarbûna kesên din, nerazîbûna xwe ya herî tund gihandin Tehranê û notayeke fermî ya protestoyê radestî dîplomatê Îranî kirin.

PeyamaKurd - Hêjayî gotinê ye, ev pêngava dîplomatîk piştî daxuyaniya fermî ya Wezareta Parastinê ya Îmaratê pêk hat ku tê de hatibû eşkere kirin du tankerên wan ên petrolê yên bi navên "Mombasa" û "Al Bahiyah" li herêma başûrê Tengava Hurmizê û di nav sînorên deryayî yên Omanê de rastî êrîşeke moşekî hatine.

Hatibû diyarkirin ku endamekî tîma keştiyê ya xwedî nasnameya Hindî jiyana xwe ji dest daye û 8 kesên din jî birîndar bûne ku rewşa çar ji wan pir giran e.