Hûsî: Me êrîşeke hevbeş li ser Îsraîlê pêk anî

PeyamaKurd - Hûsî yên li Yemenê ragihandin ku wan bi hevahengiya Pasdarên Şoreşa Îranê, artêşa Îranê û Hizbullaha Lubnanê operasyoneke leşkerî ya hevbeş li dijî Îsraîlê pêk anîne.

Di daxuyaniyekê de ku îro hat weşandin, wan got ku êrîş ji bo "berxwedana planên Siyonîst" û piştgiriya Îran, Lubnan, Iraq û Filistînê hatiye kirin.

Hûsiyan diyar kirin ku operasyon bi hevahengiya Pasdarên Şoreşa Îranê, artêşa Îranê û Hizbullahê hatiye kirin û di êrîşan de gelek moşekên krûze û wesayîtên hewayî yên bêmirov (UAV) hatine bikaranîn.

Daxuyaniyê destnîşan kir ku hedef çend xalên leşkerî û stratejîk li herêma Eilat a başûrê Îsraîlê bûn û operasyon "armancên xwe bi dest xistiye".

Hûsiyan peyamek piştgiriyê ji hêzên li Îranê û komên çekdar ên li Lubnan û Iraqê re şandin û tekez kirin ku operasyonên leşkerî "heta ku armanc werin bidestxistin wê berdewam bikin".