Li Rojavayê Kurdistanê krîza sotemeniyê kûr dibe: Li Hesekê û Dirbêsiyê jenerator bi temamî rawestiyan

PeyamaKurd - Li bajarê Hesekê nêzîkî 500 jeneratorên elektrîkê ji ber ku Komîteya Sotemeniyê mazot li ser wan belav nekiriye, ji kar ketin û bajar di tarîtiyê de ma. Dîsa li bajarê Dirbêsiyê û gundewarên wê jî karê her 77 jeneratorên ku elektrîkê didin tax û malan, ji ber nebûn û qutbûna para taybet a mazotê bi temamî rawestiya.

Ji rêveberên Komîteya Sotemeniyê ya Hesekê, Berzan Hac Mihemed ragihand ku sedema vê qutbûnê ew e ku hikûmeta demkî para sotemeniyê ya parêzgeha Hesekê nedaye wan. Hac Mihemed diyar kir ku ew carinan neçar dibin belavkirina mazotê rawestînin daku sotemeniya li ber dest bi wekhevî li ser hemû bajar û gundewaran dabeş bikin.

Rêveberê komîteyê ji ber vê kêmbûna giran a sotemeniyê daxwaza lêborînê ji şêniyan kir û destnîşan kir ku ev dorpêç û astengiyên li ser veguhastina enerjiyê, rewşa jiyanê ya herêmê her ku diçe ber bi xirabûneke mezintir ve dibe.

Jêderên xwecihî dane xuyakirin ku ji ber vê krîza sotemeniyê, niha li bajêr tenê elektrîka fermî ya hikûmetê berdest e ku ew jî rojane bi tenê 6 saetan elektrîkê dabîn dike.

Ev pirsgirêka giran ku di germê de jiyana welatiyan pir dijwar kiriye, bûye sedema nerazîbûneke mezin û li herêmê wekî aloziyeke nû ya binesaziyê tê dîtin ku bandoreke rasterast li ser kar û xebatên rojane yên xelkê herêmê dike.