Li Hewlêrê lidarxistina ahengên sersalê bi tevahî hat qedexekirin

PeyamaKurd – Li Hewlêrê lidarxistina ahengên sersalê bi tevahî hat qedexekirin û ger her hotel, kafeterya û restoran ahengan li dar bixe, wê bihên girtin û 10 milyon dînaran ceza bidin.

Li gor daxuyaniya Odeya Operasyonên Hewlêrê, Yekeyên îdarî yên her bajarekî ser bi parêzgeha Hewlêrê ve, dê xwediyên kafeterya û restorant û hotelan agahdar bike, ji ber vîrusa Koronayê ahengên sersalê li dar nexin. Her cihê pabend nebe, dê heya mehekê bihê girtin û bi pareyan bihê cezakirin.

Herwiha Odeya Operasyonên Hewlêrê hişyariyê jî dide şofêrên taksî, otobus û mînîbusan û otombîlên taybet jî, da ku pabendî rênimayiyên tendirustiyê bibin, him ew him jî rêwiyê wan bi maske bin. Pabendnebûn, wê bibe sedema destbiserdegirtina otomobîlan û cezakirina bi pareyan.

Di daxuyaniyê de hatiye destnîşankirin, merasîmên sersaxiyê û dawetan li hol û malan qedexe ye û bingeha polîs û muxtarên taxan berpirs in ji rêkarên yasayî yên li hember her kesekî ku pabend nebe.

Herî dawî hat eşkerekirin, fermanber jî divê bi maske bin û welatî jî bi maske biçin nav fermangehan.