Rejîm û çekdarên girêdayî Tirkiyê hevdu topbaran dikin

PeyamaKurd – Piştî ragihandina agirbesta Idlibê ku 5ê Adarê li Moskowê di navbera Tirkiye û Rûsya de rêkeftin li ser hatiye kirin, hêzên rejîma Sûriyê û çekdarên girêdayî Tirkiyê li Idlibê binkeyên hevdu topbaran dikin.

Li gorî ragihandina Navenda Çavdêriya Mafên Mirovan a Sûriyê (SOHR) hêzên rejîmê îro sêşemê moşek avêtin herêmên li bajarokê El-Fitêra yê gundewarên başûrê Idlibê.

SOHR da xuyakirin ku amadekariyên leşkerî yên hêzên Sûriyê gihîştine tixûbên gundewarên Idlibê. Rejîma Sûriyê karwanên leşkerî anîn derdora çiyayê El-Zawiye û gundewarên başûrê Idlibê. Herwiha Hizbullah a Lubnanê jî hêzên xwe ji gundewarên Helebê birine derdora Seraqibê.

Çekdarên girêdayî Tirkiyê jî alaveke kolandinê ya girêdayî hêzên hikumetê li derdora bajarokê Hezarîn ê başûrê Idlibê, hedef girtin.

Hêzên hikumetê jî bi gelek topan derdora Kebane ya gundewarên Lazîqiyê û rêyên pê ve girêdayî li gundewarên rojavayê Idlibê topbaran kir.

Hêjayî bibîrxistinê ye ku serokên Rûsya û Tirkiyê di 5`ê Adarê de li ser peymaneke agirbestê û meşandina dewriyeyên hevbeş li ser rêya M4, li hev kiribû ku li gorî Wezareta Parastinê ya Rûsyayê, ji ber gefên terorîstan di çend rojan bi bin ketin.