Şam têkiliyên xwe yên bi Lubnanê re sînordar dike

PeyamaKurd - Hikûmeta Demkî ya Sûriyeyê di daxuyaniyekê de ragihand ku di çarçoveya guhertinên siyaseta xwe ya derve de, têkiliyên xwe yên bi Lubnanê re tenê bi saziyên fermî yên dewletê û kesayetên neteweyî ve sînordar kiriye.

Ehmed Zîdan, şêwirmendê medyayê yê Serokatiya Sûriyeyê, diyar kir ku Şamê piştî qonaxa dawî ya guhertinên li welêt, rêbazeke nû li hember aloziyên herêmî pejirandiye.

Zîdan tekez kir ku ev gav ji bo derbaskirina mîrateya tal a berê û parastina ewlehiya neteweyî ya Sûriyeyê hatiye avêtin.

Ev helwêsta nû ya Sûriyeyê bi taybetî komên çekdar ên wekî Hizbullahê dike hedef, ku bi salan bû hevalbendê sereke yê Şamê di rêya dabînkirina lojîstîk a Îranê de.

Her çend Zîdan rasterast navê Hizbullahê nekir jî, wî îşaret bi hebûna çekdarên ku bi Pasdarên Şoreşa Îranê re hevahengiya leşkerî dikin kir û destnîşan kir ku ev polîtîkayên kevin zirarê didin berjewendiyên gelê Sûriyeyê.

Ev pêşketin nîşan dide ku piştî hatina Ehmed El Şera ser desthilatê di Kanûna 2024an de, rêya bejahî ya ku Îranê bi Lubnanê ve girêdida, bi awayekî pratîk hatiye qutkirin.

Li aliyê din, li hundirê Lubnanê jî nerazîbûnên li dijî Hizbullahê zêde dibin.

Serokwezîrê Lubnanê Newaf Selam, êrîşên mûşekî yên dawî yên Hizbullahê li dijî Îsraîlê wekî "bêberpirsiyarî" bi nav kir û hişyarî da ku ev kiryar ewlehiya welêt dixin xeterê.

Li gorî daneyên Wezareta Tenduristiyê ya Lubnanê, di şerê herî dawî de herî kêm 123 kesî jiyana xwe ji dest dane. Ev rewş bûye sedem ku hikûmeta Beyrûtê jî dest bi gavan bike da ku çalakiyên komên nêzîkî Îranê li ser axa xwe sînordar bike, ku ev yek aloziyên navxweyî yên Lubnanê di vê heyamê de kûrtir dike.