Serokê Somaliyê: "Em Plana Somaliyê ya Îsraîlê red dikin"

PeyamaKurd - Serokê Somaliyê Hesen Şêx Mehmûd bang li gelê Somaliyê kir ku rê nedin hêzên biyanî bikevin axa wan û peyama "Somalî ya Somaliyan e" şand.

Serok Şêx Mehmûd di gotarekê de li Parlamentoyê hişyariyên girîng derbarê herêma Somaliyê ya li bakurê welêt de da, bang li gelê Somaliyê kir ku wî wekî "birayên min ên li bakur" bi nav kir û wan li dijî hebûna hêzên biyanî hişyar kir.

Mehmûd diyar kir ku gelê herêmê xwedî kapasîteya mudaxelekirina rewşa îro ye û got, "Îro hemû hêz û amûrên we hene ku hûn rê li ber bicihbûna dijmin li ser axa we bigirin. Lê sibê, dema ku dijmin li ser axa we bi cîh bibe, dibe ku ev derfet û hêz li cem we nebin."

Serok tekez kir ku serwerî û yekparçeyiya axa Somaliyê nayên nîqaşkirin û diyar kir ku welatê wî biryardar e ku hemû gavên dîplomatîk û qanûnî bavêje da ku serxwebûna xwe, yekîtiya neteweyî û sînorên xwe yên navneteweyî naskirî biparêze.

Mehmûd destnîşan kir ku dîroka Somaliyê bi berxwedana li dijî dagirkerî û ferzkirinan ve hatiye şekilkirin û got, "Di dîroka we de tu serdemek tune ku dijminên neteweyê li ser axa we bi rehetî werin pêşwazîkirin."

Di 26ê Kanûnê de, Serokwezîrê Îsraîlê Benjamin Netanyahu ragihand ku Îsraîlê Somaliland wekî "dewletek serbixwe û serwer" nas kiriye. Bi vê biryarê re, Îsraîl bû welatê yekem ku Somaliland nas kiriye.

Mehmûd tekez kir ku kiryara Serokwezîr Netanyahu binpêkirina herî mezin a serweriya Somaliyê ye û biryara Îsraîlê wekî "êrîşek eşkere li ser serweriya welêt" bi nav kir.

Mehmûd îdia kir ku ev gava Îsraîlê ewlehî û aramiyê tehdît dike û dê tevgerên cudaxwaz ên li çaraliyê cîhanê teşwîq bike, lê yekîtiya civaka Somaliyê wê êrîşên Netanyahu pûç bike.