Sêwirmendê Serokwezîr: Ji bo Singalê rêveberiyeke nû tê avakirin

PeyamaKurd - Şêwirmendê Serokwezîrê Herêma Kurdistanê ji bo Karûbarê Êzdiyan Şêx Şamo, ragihand ku planeke Hikûmeta Kurdistanê heye ji bo hemû navçeyên Kurdistanî yên madeya 140 û di nav de jî ji bo Şingalê rêveberiyeke nû bê danîn.

Şêx Şamo ji malpera KDP.info re ragihand: “Planeke Hikûmeta Kurdistanê heye ji bo Şingalê ku rêveberiyeke nû bê danîn, ku qaymeqam dê bê guhertin û dê hewl bên dan ku rêveberiya şeriî û rewa vegere Şingalê, ji ber ku ew rêveberî ji aliyê milet ve hatiye hilbijartin û divê îradeya xelkê neyê binpêkirin, lê mixabin hinek hêz û milîs li wir hene ku xwe li madeya 140 nakin xwedî.”

Şamo wiha got: “Mixabin niha Şingal di nava rewşeke pir dijwar de ye û em hest dikin ku Şingal bûye meydana şerê welatên herêmê û niha ew bajêr di bin destê hêzên nerewa de ye.”

Şêx Şamo da xuyakirin: “Hikûmeta Kurdistanê planeke giştî heye ji bo rêveberiya navçeyên Kurdistanî yên madeya 140 û di nav de jî Şingal, herdû hikûmetên Kurdistan û Iraqê dê gotûbêjan li ser bikin.”