Wezîrê Derve yê Amerîka li Stenbolê ye: Ew ê bi Fîdan re hevdîtinê bike

PeyamaKurd – Blinken piştî şerê Îsraîl û Hamasê ku di 7ê Cotmehê de destpê kiribû, ji Tirkiyeyê dest bi gera xwe ya çaremîn a Rojhilata Navîn kir.

Wezîrê Derve yê Amerîkayê Antony Blinken şeva borî çû Stenbolê û bi Wezîrê Derve yê Tirkiyê Hakan Fîdan re hevdîtin pêk anî.

Balafira ku Blinken û heyeta pê re birin Stenbolê di saet 19.10an de gihîşt Balafirgeha Stenbolê.

Blinken li balafirgehê ji aliyê Balyoz Yaprak Balkan, Midûrê Giştî yê Karên Siyasî yên Dualî ya Wezareta Karên Derva, Balyozê Amerîkayê yê Enqereyê Jeffry Flake, Serkonsolosa Amerîkayê ya Stenbolê Julie Eadeh, Serokê Îdareya Sivîl a Balafirgeha Stenbolê Îlker Haktankaçmaz û rayedarên din ve hat pêşwazîkirin.

Tê payîn ku Blinken û hevtayê xwe yê Tirk Fîdan îro li Stenbolê bicivin.

Tê payîn ku di civînê de êrîşên Îsraîlê yên li ser Xezzeyê, mijarên herêmî û têkiliyên dualî bên nirxandin.

Berdevkê Wezareta Derve ya Amerîkayê Matthew Miller, duh di civîna çapemeniyê ya rojane de ragihand ku Blinken wê serdana Tirkiye, Yûnanîstan, Urdun, Qeter, Îmarat, Erebistana Siûdî û Îsraîlê bike û bi hempîşeyên xwe re çend mijarên krîtîk gotûbêj bike. Di çarçoveya gera xwe ya Rojhilata Navîn de li seranserê heftiyê got ku ew ê serdana Kenara Rojava û Misrê bike.

Tê çaverêkirin ku Blinken li Stenbolê bi Fîdan re bicive û ji aliyê Serokomarê Tirkiyê Recep Tayyip Erdogan ve jî were qebûlkirin. Blinkenê ku di 6ê Mijdara 2023an de li Tirkiyeyê têkiliyên wî hebûn ji aliyê Erdogan ve ku di wê serdanê de bernameyeke din a li derveyî bajêr hebû nehat qebûlkirin.