Bi biryara Serokwezîr Barzanî wargehên Êzidiyan Sarya û Xankê dibin nehiye

PeyamaKurd - Şêwirmendê serokê hikûmeta herêma Kurdistanê yê karûbarên êzidiyan Şêx Şamo ragihand ku bi biryara Serokwezîr Mesrûr Barzanî wargehên Şarya û Xankê yên êzidiyan wê bibin nehiye ku daxwazên êzdiyan ji aliyê serokwezîr ve hatine pejirandin.

Şêwirmendê serokê hikûmeta herêma Kurdistanê yê karûbarên êzidiyan Şêx Şamo ji BasNewsrê re daye xuyakirin: “Serokê Hikûmeta Herêma Kurdistanê baş dît ku wargehên Şarya û Xankê bibin nehiye. Ji ber êzidî piraniya wan di gundan de dijîn û di warê gihandina projeyan de hest bi mexdûriyê dikin.”

Şêx Şamo got: “Ew herdu wargeh dibin nehiye û dê zêdetir xizmet bigihe êzidiyan. Ji ber dê hin sektorên kar jî lê peyda bibin û xizmet baştir dê birêve biçe. Heta niha beşek ji rêyên wan wargehan her axin û nehatine qîr kirin, lê eger bibin nehiye dê zêdetir xizmet bigihe wan.”

Şêx Şamo diyar kir: “Li îdareya serbixwe ya Zaxo jî daxwaz û fikra nehiyebûna Dîrebûn heye, herçend carê tenê fikrekî wisa heye jî, lê ez dûr nabînim ku hikûmet bicih bîne û Dîrebûn jî bibe nehiye. Wargehên Şarya û Xankê jî dibin nehiye û Baedrê jî her nehiye ye û bi wî awayî hemû deverên êzidî li parêzgeha Duhokê dibin nehiye û xizmetekî baştir dê bigihe xelkê.”

Şêx Şamo da zanîn ku serokê hikûmeta herêma Kurdistanê pêşwazî li Mîrê êzidiyan Mîr Hazim Tehsîn Beg û Baba Şêxê êzidiyan kir û rêzeke mezin li herdu sembolên êzdiyan girt. Bê guman ew rêzgirtin di heman demê de rêzgirtina li taybetmendiyên êidiyane û civaka êzidiyane, ew tiştên ku hatin daxwaz kirin jî, ji aliyê serokê hikûmeta herêma Kurdistanê ve razîbûn li ser hat dayîn.