Îdlîb cardin rastî êrîsê hat: 17 kesan jiyana xwe ji dest dan

PeyamaKurd – Firokeyên şer ên ser bi rejima Esed cardin bajarê İdlibê bombebaran kirin û di encamê de 17 kesan jiyana xwe ji dest dan.

Li gor agahiyên ji çavkaniyên Tîmên Berevaniya Sivîlan, îro danê nîvro (10-06-2018) firokeyên hikûmeta Sûriyê navçeyên Binefş, Teftenaz û Ariha û herwiha navçeyên Ram Hemdan û Dêra Benî Îz bombebaran kirine.

Li gorî çavkaniyan li navçeya Teftenazê nexweşxaneya zarokan jî bûye amanc û di encamê de 3 jê zarok 5 kes mirine.

Herwiha li deverên din ên Teftenazê 8, li Arîhayê 2, li Binefşê kesek û li Ram Hemdanê jî kesekî sivîl canê xwe ji dest dane.

Hate gotin, ku tîmên Berevaniya Sîvîl karên lêgerîn û alîkariyê berdewam dikin û tê pêşbînîkirin ku hejmara kuştiyan zêdetir bibe.

Hêjayê gotinê ye ku roja pênşema borî jî di bombebarana  gundê Zerdane ya İdlibê de 42 kesên sivîl canê xwe ji dest dabûn.