Serokwezîr Barzanî bi wezîrê Îmaratê re sîstema elektronî û derfetên kar gotûbêj kir

PeyamaKurd - Serokwezîrê Herêma Kurdistanê Mesrûr Barzanî ku ji bo beşdarî Forula Enerjiyê ya Cîhanî (28-29ê Adarê) bibe li Îmaratê ye, bi Wezîrê Karûbarên Encûmena Wezîran a Îmaratê Mihemed Ebdulla El Qerqawî re civiya.

Hat ragihandin ku di civînê de, guftûgo derbarê pêngavên ber bi sîstema elektronî û dabînkirina derfetên kar ji ciwanan hate kirin.

Serokwezîr Mesrûr Barzanî li hesabê xwe yê Twitterê got: “Bi Wezîrê Karûbarên Encûmena Wezîran a Îmaratê Mihemed Ebdulla El Qerqawî re, me bi dirêjî guftûgo derbarê pêngavên ber bi sîstema elektronî û dabînkirina derfetên kar ji gencan re û herwiha ji bo piştevaniya kompanyayên nû kirin.”

Mesrûr Barzanî da zanîn: “Me li ser hevkariya ji bo pevguhartina ezmûna her du aliyan û herwiha fêrbûna ji pêşketina mezin a Dubey di pêşkêşkirina xizmetguzariyên giştî ji welatiyan re, li hev kir.”

Serokwezîrê Herêma Kurdistanê Mesrûr Barzanî wê li Îmaratê beşdarî Foruma Cîhanî ya Enerjiyê bibe ku di navbera rojên 28-29ê Adarê li bajarê Dubey birêve diçe.